Covid-19 avanga inkhuahkhirhna thlahdul a ni

Mizoram sorkar chuan Covid-19 lêng vanga inkhuahkhirhna eng emaw zat a thlahdul. Red zone-a awmte pawh chhun leh zanah inkhawm phal a ni a, zirna erawh online hmanga kalpui zel tura tih a ni thung.

State Disaster Mana­gement Authority hnuaia State Executive Committee (SEC) chairman mawhphurhna la mektu JC Ramthanga, additional chief secretary chuan February 18, 2022 zan khan Mizoram pum leh Aizawl bika Covid-19 kaihhnawiha khawsak dan tur inkaihhruaina a tichhuak a ni.

SEC Chairman chuan, Mizorama Covid-19 darh zel tur vênna tura inkhuahkhirhna awm mek chu thlahdul hret ṭula hriat a nih thu tarlangin, "Mizorama Covid-19 léng mek dinhmun thlir lêt niin, ziaawm lam a pan hret hret niin hriat a ni. Ministry of Health & Family Welfare chuan February 15, 2022-ah India ramah Covid-19 dinhmun a ziaawm zel thu leh inkhuahkhirhnate tikiam hret hret turin state sorkarte a hriattir a, Covid-19 donaah hian eizawnna leh mihring nunphung nghawng nasa lo zawnga kalpui turin a hriattir bawk," a ti.

Inkaihhruaina tharah hian district tina DC-te chu Covid-19 laka invenna tur inkaihhruaina Operational Guideline for Containment and Surveillance Plan of Covid-19 uluk taka kengkawh tur leh thil ṭul dang a awm chuan an district chhung dinhmun azirin inkaihhruaina an siam theih thu tarlan a ni a; a ṭul chuan CrPC 144 hmangin curfew puan theih a nih thu tarlan a ni bawk.

Inkaihhruaina thar ang chuan, Aizawl khawpuiah biak-ina leng zatve aia tam loin chhun leh zanah inkhawm phal niin, inkhawmpui chu chhunah chauh phal a ni a; inkhawmnaah zaiho, ei leh in sem phal a ni lo.

HSLC leh HSSLC exam turte tan sikul leh hostel hawn phal a ni a, sikula thawkte’n vaccine full dose lâk vek tur a ni. Zirna-in dang zawng erawh chu online hmangin zirna chhunzawm tur a ni thung.

Aizawla inkaihhruaina ṭhenkhat
• Loh theih loh thilah lo chuan páwna chhuah leh inlènpawh loh tur.
• Biak-ina leng zat zatve aia tam loin chhun leh zanah inkhawm leh, inkhawmpui (chhun lamah) phal a ni a; zaiho, ei leh in sem phal a ni lo.
• Zing ṭawngṭai inkhawm phal a ni.
• HSLC leh HSSLC exam turte tan sikul leh hostel hawn phal a ni a, sikula thawkte’n vaccine full dose lâk tur.
• Zirna-in dang zawng online-a chhunzawm tur.
• Training institute-ah a zatvea kal phal a ni.
• Board exam, recruitment exam, adt. phal a ni.
• Inneih leh mitthi vui inkhawmah a hmuna leng zat zatvein phal a ni a, ei leh in sem phal a ni lo.
• Picnic spot hawn phal a nih laiin, swimming pool, public park leh sahuan hawn phal a ni lo.
• Lui kal, trekking, hiking, adventure sports, adt., zing/tlai walking leh cycling exercise-te phal a ni.
• Gym, lu mehna dawr, restaurant, movie theatre, private company/ office - consultancy service-te a hmuna leng zat zatvein hawn theih.
• Beauty parlour leh spa-te appointment la hmasain dàwr theih a ni a, dawr chhungah innghah khawm phal a ni lo.
• Inkhelh phal a ni.
• Sport tournament, adt. (indoor & outdoor) entu awm loin huaihawt phal a ni.
• Mipui punkhawm (birthday, anniversary, adt.) phal a ni lo a, national/state level-a pawimawh bikah sorkar phalna lain
a theih.
• Sorkar pisaah group C & D-te a zatvea inkal chhâwk tur.