Central service kan nei hlei thei lo hi kan inenfiah a ngai - HTE Minister

Higher & Technical Education minister Dr R Lalthangliana chuan February 19, Inrinni khan Serchhip College-a science building sak thar a hawng. Minister chuan, “Central service lam kan nei hlei thei lo ta hi kan inenfiah a ngai,” a ti.

Dr R Lalthangliana chuan, School Education Minister a nih lai aṭangin Mizoram chu India rama ziak leh chhiar thiam (literacy rate)-ah pakhatna nihtir tumin ṭan a lak nasat thu a sawi a, “A har khawp mai a, tun thlengin Kerala kan la tluk thei lo. Pahnihna kan la ni reng a, pakhatna ni thei turin ṭan la thar zel ang u,” a ti a; Mizorama college 30 vel zinga Serchhip College-in NAAC grade A a hmu chu a lawmpui thu a sawi.

HTE Minister chuan, “A tak taka zirlaite thiamna hai chhuah hi a pawimawh a, degree emaw certificate ṭha leh mark hmuh san ringawt a tâwk lo. Kristian ram kan intih lai te, ram ralmuang kan intih laite hian central service lam kan nei hlei thei lo ta hi kan inenfiah a ngai hle,” a ti a; taimakna, tumruhna leh thawhrimna nen bei turin zirlaite a chah.

Serchhip College science building hi Rashtriya Uchchatar Shiksha Abhiyan (RUSA.2.0) aṭanga hmuh cheng nuai 156 sênga sak a ni a; a hawnna inkhawmah hian HTE secretary Esther Lalruatkimi, Serchhip DC Nazuk Kumar leh sorkar hotu dangte an tel a ni.