Aizawlah a záwna zan 698 curfew a nih hnuah zan curfew hlih a ni

Aizawl khawpuiah zan 698 chhung chatlak awm loa zan curfew kalpui a nih hnuah February 19, Inrinni aṭang khan zan curfew hlih a ni.

Aizawla zan curfew hlih a nih thu hi Aizawl district bawrhsap Dr Lalhriatzuali Ralte chuan February 19, 2022 khan thupek chhuahin a puang a, "CrPC Section 144 (Act no. 2 of 1974)-in thuneihna min pek anga Aizawl city area huam chhungah zan tin dar 9 aṭanga a tûk zing dar 4 thleng páwn chhuah khapna thupek lo chhuah tawh chu Covid-19 dinhmunin ziaawm lam a pan hret hret avangin thu leh awm hma chu tihtawp a ni tih ka puang e," a ti.

Aizawl Bawrhsap chuan, Covid-19 laka himna tura sorkar kaihhruaina siamte chu ṭha taka zâwm chhunzawm zel turin mipui a hriattir nghal a ni.

Curfew hlihna thupekah chuan, Mizorama Covid-19 léng mek laka mipui him theihna atana Mizoram sorkara Disaster Management & Rehabilitation department Order no. B-13021/101/2020-DMR/Vol-VI Dt. 18.02.2022 thuchhuak bawhzuiin, páwn chhuah khapna thupek chhuah tawh chu sût ṭula hriatna a awm tâk thu tarlan a ni a; Covid-19 dinhmunin ziaawm lam a pan hret hret vang a nih thu tarlan a ni bawk.

Mizoramah March 23, 2020 aṭanga total lockdown puan rualin zan curfew kalpui ṭan nghal a ni. Aizawl khawpui bikah chuan March 23, 2020 aṭang hian chatlak awm loin zan lama pawn chhuah khap kalpui a ni ta char char a, February 18, 2022 zan thleng khan kalpui niin, a záwna Aizawla zan curfew kalpui rei zawng chu ni 698 a ni a, ni 32-in kum hnih a pumhlûm hman lo.

Aizawl khawpuia zan curfew order tihchhuah hnuhnung ber, January 31, 2022-a tihchhuah chu March 31, 2022 thleng awh tura tih a ni a, order chhuah lai hian Mizorama Covid-19 positive active case chu 12,559 a ni. Zan curfew hlih laia Covid-19 positive awm zat chu 9,919 a ni thung.