KHAWTHLIR

Thisen pe
Inrinni khan ṬKP, Luangmual Bial chuan Zonuam BCM kohhran hall-ah thisen pein, Civil Hospital, Aizawl (CHA) tan unit 52 an pe a, petute mipa 42 leh hmeichhia 10 an ni a; 1 Mizo Squadron Air NCC-te’n CHA blood bank-ah unit 37 an pe a, petute mipa 33 leh hmeichhia pali an ni. KṬP, Tuikhuahtlang Branch-in KṬP Day leh an branch silver jubilee pualin an kohhran hall-ah Synod Hospital tan unit 35 an pe a, petute mipa 25 leh hmeichhia 10 an ni. KṬP Zobawk Bial pawhin Lunglei Civil Hospital tan pein, mipa 12 leh hmeichhia paliin unit 16 an pe a ni.

Dialysis sawiho
February 19, Inrinni khan Civil Hospital, Aizawl (CHA)-ah Health & Family Welfare Board vice chairman Dr ZR Thiamsanga, MLA leh damdawi lam hotute’n CHA Dialysis Unit-a harsatnate an sawiho. Dr ZR Thiamsanga chuan, mamawhna a san em avangin a ṭul ang zela harsatna awmte sukiang tura ûm zui a tum thu a sawi. CHA-ah hian dialysis khawl 12 awmin, ṭha taka a kal tluan chuan nikhatah damlo 36 enkawl theih tura ngaih a ni.

Inthiarna hawng
AMC ward-III councillor C Lalchhandami chuan a ward fund hmanga Ramhlun Venglai kawngpui sira vantlang inthiarna, ODF+ standard-a sak thar chu February 19, Inrinni khan a hawng. C Lalchhandami chuan, inthiarna hmangtute chu thianghlim leh fel taka hmanga enkawl turin a chah.

Lei pathum Dawh zo
Khedacherra-Damcherra-Zamuang-Kawrthah-Tuilutkawn (KDZKT) Road-a lei (bridge) dawh zawh tawh pathum chu tun hnai khan PWD hotute’n an hawng. Lei hawn takte chu cheng nuai 579.73 sénga siam Zawlnuam khaw chhunga Bawrai lei, nuai 552.80 sénga dawh Bawrai-Bungṭhuam inkara Chengkawl lui lei leh, nuai 400 sênga dawh Luimawi-Kanhmun inkara Peka lui leite an ni. PWD hotute chuan Kawrthah Division hnuaia lei dawh mek Teirei lei leh Langkaih lei an enfiah bawk.