Hmasawnna hna thawh mek enfiah

Planning & Programme Implementation department secretary Lalmalsawma Pachuau chuan, February 19, Inrinni khan Champhai leh a chhehvela hmasawnna ruhrel siam leh thawh mekte a enfiah a; hna thawktu leh viltu department-te chu project a hlawhtlin theih nan theihtawp chhuah turin a chah.

Planning Secretary hian Non Lapsable Central Pool of Resources, NLCPR (DoNER) kaltlanga cheng nuai 1,988 sénga Champhai khawpui kianga luang Keilungliah lui tui khuah hna thawh mek te, Champhai Forest Division hnuaia cheng nuai 200 sénga NEC project hmalakna Afforestation of Denuded Hills in Champhai District kaltlanga hmalakna te, Champhai Truck Terminal siam mek leh DRO pisate a tlawh a ni.

Project thawhte chu hun bituk chhung ngeia ṭha taka zawh a pawimawh thu sawiin Lalmalsawma Pachuau chuan, “Hmachhawp leh hmalakna tur dangte thlengin a nghawng theih avangin hunbi tuka zawh leh hna ṭha taka thawh a pawimawh. Project ṭha tak takte a kaihhnawih leh mipuite’n ṭangkai taka an chhawr theih nan ruahman a ṭul,” a ti.