Online-a thil zawrhah fimkhur turin chah

Inspector general of police (IGP) John Neihlaia, Mizoram Police Media Cell chief public relations officer ni bawk chuan, online (instagram, facebook, whatsapp business) inbumna lakah fimkhur turin mipui a chah a; tlâwm uchuak taka bungraw zawrhte chu inbumna a ni duh tih a tarlang.

John Neihlaia chuan, tun hnaiah internet kaltlanga inbumna a hluar thu tarlangin, “Heng inbumna hrang hrang zingah hian armed forces officer/sipai anga inchhál, an thlalak, identity, etc. daha mi bum chíng an tam hle. Heng mite hian bungraw hrang hrang - motor, bike, in chhung bungruate zuarin a man an dawn (received) hnuah an bungraw zawrhte a leitu hnen thlen loin an bibo ṭhin,” a ti.

Mi bum chíngte’n sipai tana ei tur (sangha, sa chi hrang hrang, cake, balhla, etc.) order derin, a zuartute an bum ṭhin tih tarlangin IGP chuan, “An order man pekna turin a zuartute hnenah QR code scan tirin, a zuartute pawisa an lak chhuahsak ṭhin a, mi tam tak an bum mek. Hriat tur pawimawh tak chu, kan account-a pawisa lo lut turin six (6) digit UPI PIN GPay, BHIM emawah pek a ngai lo a, heng PIN pek ngai titu chuan bum a tum che tih hriat tur a ni,” a ti a; online kaltlanga sumdawnna zingah dik taka kalpui tam tak an awm laiin, misual ṭhenkhat mi bum tum hrim hrim an awm thu a tarlang a ni.

Online sumdawnaa hriat tur
• Dawr tlawhtute comment aṭangin a rintlak nge rintlak loh hriat tum hmasak ni se.
• Dawr neitute leh pawisa pekna tur account hming/address a inmil em tih en tur.
• Bungrua a man pangngai aia tláwm uchuak lutuka zawrhte inbumna a ni duh.
• Online dealership, distributorship, etc. pe thei anga insawi tam tak hi inbumna a ni.