ILP pek chhuahah fimkhur duh

Mizoram Merchant Association (MIMA) chuan thuchhuah siamin, inner line permit (ILP) pek chhuahah uluk leh fimkhur zawka kal ṭha an tih thu an tarlang.

MIMA chuan, Home department-a ILP khawihtute’n ILP an pek danah uluk leh fimkhur zawkin ti se ṭha an tih thu tarlangin, “ILP an peka sponsor-tu, Mizo hming ziaka chhui chian hleih theih loh leh contact number thi tawh/number dik lo dah mai maite a awm fo. Address chhui tlak loh awm ṭhin hi hnâwlin, permit pe lo se kan duh,” an ti.

ILP kum hnih nung chu dan ang tak chuan neih hleih theih a nih loh thu tarlangin MIMA chuan, “Hetih lai hian nei an awm nual tawh. An lo pek tawh, felhlel awmte chhui chhuak a, en zuia cancel sak kan duh a, kan ngen nghal a ni,” a ti a; ILP chu Mizo hnam leh ram himna a ni tih hria a, Mizo tawh phawt chu vawnghim tlat turin an chah.

MIMA chuan, Covid-19 avangin an eizawnnaah an tawrh nasat avangin Chief Minister hnenah an harsatna an sawipui tih sawiin, “CM leh Deputy CM-te hian kan harsatnate min hriatpuiin, ni tina kan eizawnna hna kan thawh chhunzawm theihna tura rang taka hma min laksak avangin an chungah kan lawm hle. Lawmthu kan sawi a ni,” an ti.