Thingdawl CoE-in nuai 75 hmuh beisei

Thingdawla Centre of Excellence for Horticulture chuan kum 2021-22 chhungin thlai chî leh ṭiak chi hrang hrang hralhna aṭangin cheng nuai 75 vel hmuh an inbeisei.

CoE, Thingdawl hi February 19, Inrinni khan MJA Gen.Hqrs hruaitute leh Kolasib MJA member-te'n an tlawh a; Kolasib-a Horticulture officer C Zosanga leh CoE project officer Lalnunpuia ten an hmalaknate an lo hrilh a, thlai chi leh ṭiak hralhna aṭangin intodelh tura beisei a nih thu an sawi.

CoE hmun zau zawng chu hectare 21.85 a ni a, thlai chìnna atana hman mek chu hectare 5.3 niin, greenhouse-in hectare 9.56-a zau a awh.

Greenhouse chhungah rose chi hrang hrang, curcuma alismatifolia, anthurium, tomato, capsicum, zikhlum, budded orange leh dragon fruit kung ṭhahnem tak a awm a; open field-ah balhla, theihai, rambutan, mangosteen, sweet tamarind, valencia, coffee, kuhva, sweet flag, kawlthei, citronella leh dragon fruit chìn mek a ni. Changpat aṭanga leiṭha siamna vermiculture 16 leh khuai bu 50 an enkawl mek bawk.

CoE, Thingdawl hian kum 2021 khan anthurium par 750, curcuma par 1,865, rose par 2,400 an thar a, dragon fruit rooted cutting 1,21,800 an pek chhuah bakah, a rah quintal 20 an thar. Thlai leh thei dang eng emaw zat an thar bawk a ni.