MHA thu kalha lirthei leh police Kawlte lakah action lak a ni lo

Ministry of Home Affairs (MHA) chuan September 21, 2016 khan hriattirna chhuahin, police official chàwl tawhte'n inlama ardali (orderly), personal security leh lirthei an kawlte chu sorkar hna an chawlhsan aṭanga thla khat hnuah sorkarah an pe kîr vek tur a ni, a ti. Hei hi Mizoram sorkara thawk IPS leh MPS châwl (pension) tawh ṭhenkhatin an zawm lo a, Mizoram sorkar pawhin action a la ngai lo nia thu dawn a ni.

Vanglaini-in RTI Act hmanga zawhna a siam, Police Headquarters-a SPIO-in a chhan danin, MHA joint secretary (Police-II) V Shashank Shekhar chuan September 21, 2016 khan office memorandum a tichhuak (No-1-4502/09/2016-Pers-II dt 21.09.2016) a; state leh union territory sorkara chief secretary te, Central Armed Police Forces & Assam Rifle/Central Police organisation leh state tina Director General of Police-te hmalakna tur a nih thu a chuang.

Office memorandum chuan, police official, sorkar aṭanga càawl tawhte chuan in lama ardali, personal security leh lirthei an kawlte chu sorkar aṭanga an chawlh aṭanga thla khat chhungin sorkarah an pe kîr vek tur a ni, a ti.

'Police officer pension tawh hnenah venhimna pek a nih dawn chuan, amah vauna leh a tana him lo bik a nih leh nih loh enchian phawt tur a ni a. Tun hmaa a post lo chelh tawh kaihhnawiha vauna satliah velah chuan venhimna pek a ngai lo,' tih a ni. Office memorundum point no. 3-ah chuan, 'A chunga kaihhruaina hrang hrang sawi ang zâwm lotu officer pension tawh chu, a pension hnua hamṭhatna an lo pek tawh hrang hrangte man chu rulhtir tur a ni. Fimkhur lo taka chutianga lo petu officer ṭanglai pawh chu hrem tur a ni ang,' tih a tel.

Hetih lai hian, Police headquarters SPIO chuan RTI Act hmanga zawhna chhannaah, police hotu sâng, IPS leh MPS officer, sorkar hna aṭanga châwl tawh zingah sorkar lirthei kawl zui an awm loh thu leh, mahni in lama police (orderly/ardali) kawl zui an awm loh thu a tarlang a; IPS leh MPS pension tawhte'n ardali an kawl zui theihna dân a awm loh thu a rarlang bawk.

Mizoram sorkara thawk ṭhin police hotu sang, sorkar hna aṭanga châwl tawh zingah mahni in lama sorkar lirthei kawl leh ardali kawl an awm thu Vanglaini chuan a lo tarlang tawh a; chumi hnuah Mizoram DGP Balaji Srivastava chuan, chutiang thil chu an hriat thu leh tihtawp an tum thu a lo sawi tawh.

DGP Balaji Srivastava chuan, police officer pension tawh zinga ṭhenkhatin police ardali leh motor an la kawl zui zel chungchang chu an chhui zui mek thu a sawi a, "Police officer-te'n an naute an chhawr ṭhin chungchang pawh kan hria," a ti a; ardali leh motor-te chu lak lêt an tum thu May 23, 2018 khan a sawi a ni.