MNF leh Zorama hi mipui hnâwl hnu - Zodintluanga

Inrinni zing khan Aizawl East-I biala Cong­ress party candidate K Vanlalrawna campaign hawnna hun, Zemabawk Bazarah buatsaih a ni a; Congress Campaign Committee chairman Zodintluanga, minister chuan thu sawiin, MNF leh an president Zo­­ramthanga te chu Mizoram mipui hnâwl hnu an nih thu a sawi.

Zodintluanga chuan, Zoramthanga chu Cham­phai bial pahnihin an hnâwl hnuah East Tupuiin an hnâwl leh tawh tih a sawi a, "A pian leh mûrna mipuiin an hnâwl an hnâwl tawh hnu hi Aizawl East-I biala mipuiin an lo chawi san ngawt chhan tur a awm lo. MNF President hi kum 10 an sorkar chhunga a thil tihte an la hre reng a ni," a ti.

MNF kum 10 sor­kar laiin Congress hma­lakna hmin sa tawh State Referral Hospital tur an tihṭhuanawp vek thu sawiin Zodintluanga chuan, "Tuirial Hydel Project pawh compen­sation vangin a chhe vek hman a, Aizawl tui lak Greater Aizawl Water Supply Scheme-te pawh kum 10 chhungin an khâl chhe hman a ni," a ti a; Congress a sorkar leh hnuah MNF tihchhiat tawh hnute chu hnam ro chi hrang hrang din thar leh a nih thu a sawi.