Kan candidate-te hi mi rintlak leh ṭha vek an ni - MPCC Media

Mizoram Pradesh Congress Committee (MPCC) Media depart­ment chuan October 13, Inrinni khan Aizawl Press Club-ah thuthar thehdarhtute an kâwm a, kumin MLA inthlana an candidate turte chu mi rintlak leh ṭha an nih thu an sawi.

MPCC Media de­part­ment chairman Lallianchhunga chuan, Mizoram Kohhran Hruaitute Committee (MKHC)-in mi ṭha leh rinawm, Pathian ṭih mi, ruih theih thila fihlîm, hlêpna bawlhhlawh leh thamna duh lo mi, sakhua, pawh leh kohhrana mi rinawm an duh ang, candidate atan chutiang mi chu an party-in an thlan chhuah thu a sawi a, "Kristian ram kan nih angin political party chuan a theih chin chinah Kristian ngei candidate kan dah ṭhin. Chu chu duh tâwk loin Congress chuan kan candidate-te hi kohhran hrang hrang aṭangin a láwr ṭhin a ni," a ti.

Lallianchhunga chuan, an party candidate-te chu ram leh hnam vei mi an nih thu sawiin, "Ṭhenkhatte phei chu political party danga an awm lai pawha Mizoram sorkarin party feeling dahṭha a, ṭangkai taka a lo hman ṭhin tawhte an ni. Mizoram hmasawnna tur a nih chuan Congress hian tumah a thliar hrang ngai lo," a ti a; an party candidate-te chu Mizoram hmasawnna atana mi rintlak leh ṭha an niin a sawi.

Congress sorkarin a hnathawkte harsatna hriain sum harsa chung chungin 7th. Pay Co­mmission rawtna hman a tum tih sawiin Lal­lianchhunga chuan, "Hemi atan hian rua­hmanna a kal zel a, pay fixation buatsaih mek niin, kumin chhung ngei hian Mizoram sorkar hnathawkte'n an hlawh thar an lak a beiseiawm," a ti a; 7th. Pay leh chhan dan hrang hrang vangin sorkar hnathawkte Cong­ress sorkarah an lung­awi niin a sawi bawk.