Presbytery Inkhawmpui neih a ni

Mizoram Synod hnuaia inkhawmpui lian ber dawttu, Presbytery Inkhawmpui, October 11, Ningania ṭan chu nizan khan a ṭiak a; nimin khan chawhma inkhawmah kohhran upa tharte nemngheh an ni a, chawhnuah Lalpa Zanriah Sakramen ṭheh a ni.

Presbytery Inkhawm­pui hi Mizoram chhunga presbytery 41 leh Mizo­ram páwna presby­tery pathumah neih a ni a; October 11 khan Nomination Committee, Finance Committee leh Sub-Pastoral Committee-te an ṭhu a, kohhran upa atana thlan tharte tan exam buatsaih a ni. Zirawpni leh Inrinni khan nilengin rorel a ni a; presby­tery chhung thil leh ram pum huap thilte relin, mahni presbytery pawn lam thilte chu Synod-a kal zel tura thawn a ni ang.

Presbytery Inkhawm­pui hi Synod puipate'n hmun hrang hrangah an hmanpui a; moderator Rev. F Lalrinnunga'n Kolasib Presbytery (Kolasib Electric Veng-ah), secretary (senior) Upa R Dengzikpuia'n Chhim­tawp Presbytery (Bung­tlang South-ah), secretary (junior) Rev. R Vanlalnghaka'n Chhawrpial Presbytery (Phulbialah), senior executive secretary Rev. Lalramliana Pachuau-in Aizawl Bethel Presbytery (Laipuitlangah), execu­tive secretary Rev. PC Pachhunga'n Hmar­phei Presbytery (Zohmunah), executive secre­­tary Rev. B Sang­thanga'n Lunglei East Presbytery (Hnahthialah), finance officer Rev. H Remthanga'n Khaw­thlangtuipui Presbytery (Tlabung Zodinah) leh statistician Rev. R Lalnuntluanga'n Aizawl West-II Presbytery (Tanhril Vengtharah) an hmanpui a ni.