KHAWTHLIR

SAY Sunday
Nimin, Pathianni kha Salvation Army Youth (SAY) Sunday a ni a, Salvation Army India Eastern Territory huam chhunga corps leh society hrang hrangte'n an hmang. SAY Sunday pual hian corps/society hrang hranga SAY-te chuan social institution te, damdawi-inte leh hmun dangte an tlawh a, ṭanpuina an hlan. SAY Sunday pual hian thianghlimna inkhawm neiin, thupui chu 'Ṭhalaite leh thianghlimna' tih a ni a; chhandamna inkhawm nei bawkin, thupui chu 'Ṭhalaite leh taimakna' tih a ni.

Lunghlu man
Mizoram Police-a Aizawl District Executive Force (DEF)-a mite chuan October 13, Inrinni chawhnu dar 2 vel khan New Capital Complex-ah khan lunghlu (ruby diamond) carat 14.25 an man a, a neitua puhte pawh man nghalin, Customs department hnenah an hlan.Lunghlu neitua puhte chu - Zohmingsanga (34) s/o Pahlira, New Siaha (tuna Edenthar Vengthlanga khawsa mek) leh H Lalremruata (21) s/o H Lalmuanpuia, Kulikawna cheng mek, Siaha New Colony mite an ni. Lunghlu an mante chu carat 3.60, carat 3.65, carat 4.20 leh carat 2.80-te a ni a; a vaiin cheng nuai 100 hûa ngaih a ni.

Candidate puan hun
Ṭangrual pawl, Zoram Peoples' Movement (ZPM) chuan Mizoram Legislative Assembly pariatna atana November 28, 2018-a inthlanpui neih tura an candidate turte chu October 24-ah Aijal Club-ah an puang dawn. Thu dawn danin, ZPM candidate-te hi ZPM Val Upa Council-in an puang dawn a, candidate-te chu intiamkamna ziahtir nghal an ni ang.

District fai lawm
India ram puma state leh district fai intihsiakna, Swachh Survekshan Grameen 2018 result tun hnaia puan taka Aizawl district-in India hmar­chhak biala pahnihna a nih chu October 12, 2018 khan PHE department-in PHE Rural WATSAN Division Office, Laipui­tlangah an lawm a, PHE chief engineer C Lallunghnema khuallian a ni.