Hmarchhak state-te kan ṭanho loh chuan Ngaihthah kan hlawh zel ang - Meghalaya HM

Meghalaya Home minister James Sangma, National Peoples' Party (NPP) thupuangtu chuan, hmarchhak state-te chu an ṭanho loh chuan ngaihthah an hlawh zel dawn niin a sawi.

Kolasib-a NPP pisa-ah Inrinni khan thu sawiin James Sangma chuan, Central-in ram tana hmar­chhak bialin theihna a neihte an hre duh lo nia sawiin, "Hmar­chhakah hian ram tana nunna chán te, infiam­na khawvela ram tihmingṭhatute leh kawng dang hrang hranga India tihmingṭhatu kan awm tih hi an hre duh lo. A chhan chu member of parliament (MP) kan neih tlem vang a ni," a ti.

James Sangma chuan, hmar­chhak MP-te'n state hmasawnna atana Central minister-te an biakin ngaihthah an ni ṭhin nia sawiin, "Ngaih pawimawh kan hlawh theih nan kan ṭanrual a ngai. Kan ṭanrual chuan ngaih pawi mawimawh kan hlawh ang," a ti a; mi tam takin hmarchhak mipuite an ṭanrual theih an rin lohna chu a dik lohzia lantir a ṭul tih a sawi.

Ṭhalaite'n hna an neih theihna atan policy neih a ṭul thu sawiin NPP Thupuangtu chuan, "Ṭhalai hna nei lo an tam lutuk chuan nakinah harsatna lian tak a thleng thei. Engtikah mah sorkar hna hian ṭhalai lehkhathiamte a daih dawn lo. Sorkar hna páwn lama ṭhalaite'n thawh tur an neih theihna atan hmalak a ngai a, chu chu NPP-in kan ngai pawi­mawh," a ti.

James Sangma chuan, NPP chu kum 6 chauha upa a ni tih sawiin, "Hemi chhung hian theihtawp kan chhuah a, state hrang hrangah MLA 37 kan nei mek. Minority, Kristian leh tribal tana ding kan ni a, a dintu PA Sangma khan kan aw hian central a thlen phak loh avangin kan ṭanrual a ngai tih a hre chiang a ni," a ti a; central-in hmarchhak mite a hmuh dan thlak a ṭul thu a sawi.

Inkhawm hi Kolasib district-a NPP convener John Lalremruata'n a kaihruai a, NPP hruaitu dangte pawhin thu an sawi a ni.