MZP-te'n lungawi lohna lantir dawn

Mizo Zirlai Pawl (MZP) headquarters, Kolasib hruaitute chuan electoral roll-a Bru thun chungchangah October 13, 2018 khan Kolasib district election officer (DEO) Dr Arun T, district bawrhsap chu a pisaah an hmu a; Tripura-a Mizoram mi Bru-te Mizoram electoral roll-a thun thar ṭul an tih loh thu an thlen. Kolasib MZP-te hian vawiinah lung­awi lohna lantir an tum.

Kolasib MZP thuchhuah chuan, Mizorama kîr duh lo Bru-te chu electoral roll revision-a hearing neihnaah an inlan loh avangin an dilna hnâwl a ni tawh tih sawiin, "DEO-ah complaint an neih leh avangin tlai khawhnuah roll-a an luh theihna turin an awmna hmun Tripura-ah kal chilhin, verification neih a ni. Hei hi MZP-in kan duh loh avangin DEO Dr Arun T hnenah kal­tlangpui lo turin kan thlen. Tripura-a Bru-te hi sorkar­in an lo lêt hun a siamah lo kîr duh lo an ni a, hei vang hian roll-ah an awm ve hi a ṭul kan ti lo," a ti.

Kolasib bawrhsap Dr Arun T IAS chuan, Election Commission of India (ECI) aṭanga an thu hmuh angin Bru verification chu kalpui an nih thu a sawi a; a tih theih bak a nih thu leh a thuneitu sang zawk ECI hotu lian, October 16, Thawhlehnia Mizoram rawn tlawh turte hnenah lo thlen turin a hrilh.

Kolasib MZP hian sorkar thil tih dana an lungawi lohna lantir nan vawiin chawhma dar 11 aṭangin Kolasib College kawt aṭangin DC pisa kawt thleng kawng an zawh dawn a, DC pisa kawtah sitting demonstration neih nghal an tum. An thil tih turah hian thláwp tur leh telpui turin Kolasib-a NGO-te leh mipui an sáwm a ni.