Dr R Lalthangliana'n politics-a a khelh chungchang MNF party-in an sawifiah

MNF party chuan thuchhuah siam­in, PRISM leh mi ṭhenkhatin MNF vice president Dr R Lalthangliana, a hnathawh pangngai leh politics a khelh chungchanga an sawisel ṭhin chu an hriat chian loh vang a nih thu an tarlang.

MNF chuan, January 22, 2018-a PRISM press release-ah Dr R Lalthangliana, Pachhunga University College (PUC)-a associate professor ni mek leh Mizoram University leh college-a zirtirtute politics-a an inhman a rem loh thu leh, dan kalh a ni anga an tarlang chu an hriat chian loh vang a nih thu an tarlang a; tun thlenga sawi zui reng a la nih avangin, mipui hriatah thu dik puan chhuah a ṭula an hriat thu an sawi.

MNF tarlan danin, India rama university leh college enkawltu University Grant Commission (UGC)-in committee a din, Prof. Yashpal kaihhruai Task Force-in "Report on Code of Professional Ethics for University and College Teachers' a thehluh, December 27, 1988-a UGC-in a pawm tâka Preamble no. II-ah chuan, university leh college zirtirtute chanvo (rights) chiang takin a tarlang a, India khua leh tuite chanvo pangngai leh politics-a zalenna pumhlûm (full civic and political right) pek an nih thu a chuang. Chu notice no.F.1-4/87(PS-Cell), 17th. February, 1989 chu India rama university vice chancellor leh college principal zawng zawngte thawn an ni a; UGC order chu tun thlengin a la danglam lo.

UGC hnuaia awm Mizoram University (MZU) inkaihhruaina dan (ordinance) OE-7, Clause-8(IV)A-ah chuan UGC thu angin MZU leh a zawmpui PUC-a zirtirtute chu India Parliament emaw, state legislature leh district council election-in extraordinary leave kum 10 aia rei lo a pe thei ang, tih a chuang a; hei hian MZU hnuaia zirtirtu thawk nghette chu 'Politics-a tel turin zalenna an nei' tih a tarlang.

MZU pian hmain North Eastern Hill University (NEHU) hnuaia zirtirtu eng emaw zatin UGC phal angin political leave an lo la tawh ṭhin. Mizorama sorkarna siam tawhah Lalhlimpuii, Dr JV Hluna, Dr R Lalthangliana, Dr Lal­zama, Sanghmingthanga H Pautu, Lalchamliana leh Dr H Lallungmuana ten university phalna neiin political leave an lo la tawh tih sawiin MNF chuan, "He dan tlawhchhan vêk hian tun dinhmunah political party hrang hrangah (PRISM tiamin) university leh college zirtirtute an inhmang mek a ni," an ti.

MNF chuan, "University leh college-a zirtirtute politics-a an tel phalna dan ṭobul dik tak chu, professos-te hi India-in a mithiam neihte an nih avangin, ram inrêlbâwlna (politics)-ah an telin, ram hmêl danglamna leh hmasawnna nasa tak thlen thei tura ngaih an nih avangin politics-a tel phalsak an ni a, hamṭhatna leh chanvo danglam bik pek tum vang a ni lo," an ti a; ram hmasawnna tur beiseina vang chauha tel phalsak an nih thu an sawi bawk.