Champhaiah dan zirna buatsaih

Champhai District Legal Services Authority leh High Court Legal Services Committee, Gauhati High Court, Aizawl Bench-te chuan Inrinni khan Champhai College Multipurpose Hall-ah dan lam inzirtirna leh victims compensation semna hun an buatsaih a, Gauhati High Court judge Justice Michael Zothankhuma'n a hmanpui.

Justice Michael Zothan­khuma chuan, tunlai khawvel­in ruihhlo a buaipui avangin Police department leh Excise & Narcotics department mite chauh ni lo, mipui pawhin thuhretuah dingin, dan kengkawhtute nasa takin an pui thei tih a sawi a, "Dan kengkawhtu Police leh Excise-te pawhin dan bawhchhetute man kawngah tihsual a awm lohna turin danin a phût ang thlapa thil an tih a ngai," a ti.

Tihsual vanga dan bawhchhiate hrem loha an chhuah theih ṭhin avangin, dan kengkawhtute chu mawhphurhna sang tak an nei tih hria a, fimkhur lehzual turin Michael Zothankhuma chuan a chah a ni.

Gauhati High Court, Aizawl Bench joint registrar Laldinpuia Tlau chuan ‘Role of enforcemnet agency in war against drugs’ tih thupui a sawi a; registrar Helen Dawngliani'n ‘The Rights of Women & Children’ tih thupui a sawi thung.

Inkhawmah hian mi 21 hnenah Mizoram Victims of Crime Compensation Scheme, 2011 hnuaiah vanduaina tawh vanga zangnadawmna pek a ni.