UPC LAD-in inkhawmpui hmang

UPC (North East India) hnuaia hmeichhe pawl, Ladies Auxiliary Department (LAD) North Mizoram District chuan October 12, 2018 aṭang khan Thenzawl Field Veng UPC biak-inah conference vawi 50-na, Golden Jubilee Conference an hmang a, nimin chawhma khan chief minister Lal Thanhawla'n a hmanpui.

Lal Thanhawla chuan, mite tan malsawmna ni ṭheuh turin UPC nuho a chah a, "Missionary hna pawh hi mahni taksa ngei kala thawh leh, kan sum leh pai hmang pawhin a thawh theih a, kan phâk ang tâwk ṭheuhin missionary kan ni thei a ni," a ti. Kristiante chu Chanchin Ṭha hril tura koh an nih ang­in, thing leh mau, nungchate chungah pawh Chanchin Ṭha hril Pathianin a duh thu a sawi.

UPC LAD Conference-ah hian thupui chu 'Puitlin lam i pan ang u' tih a ni ang a, speaker hrang hrangin an sawi. Conference hi Zirtawpni zanah ṭan a ni a, Inrinni khan nilengin golden jubilee an lawm a ni.