Zirliana leh Thanliana MNF-ah an lut ; Ramri humhalh ngam hruaitu ka duh - Lalzirliana

Home minister leh MPCC vice president hlui R Lalzirliana leh MLA Lalthanliana, MPC ticket-a Aizawl North-II aṭanga thlan tlinte chu nimin khan Mizo Hnam Runah MNF party-a lawm luh an ni. R Lalzirliana chuan, ramri humhalh ngam hruaitu neih a duh thu a sawi.

Lawm luhna inkhawm hi MNF vice president R Tlang­hmingthanga'n a kaihruai a; R Lalzirliana chuan, MNF-a a luh chhan pakhat chu ramri humhalh ngam hruaitu neih a duh vang a nih thu a sawi a, "MZP-te'n kan chief minister hmasa ber Pu Ch. Chhunga ram Zophaiah Zofate Chawlhbuk an sa a, an ṭhiahsaka an sak leh dawnin, Assam Police-in an vua a, an kâp bawk a, baklénga tlanchhe lo thei loin an awm a ni," a ti.

R Lalzirliana chuan, Congress Legislature Party (CLP)-in lungrual takin Zophai hmuna Zofate Chawlhbuk sa turin thutlukna an siam thu sawiin, "He thutlukna hi Chief Minister pawmpui a ni. Pu Lal Thanhawla kaihhruai sorkar pawh fak kan hlawh phah hle. Mahse, MZP-te thâwm a reh hnuah chawlhbuk sak tumna kan nei tawh lo," a ti a; sorkar a ngawih tâk avangin MZP-te chawlhbuk sa tura an inbuatsaih leh thu a sawi.

MZP-te chawlhbuk sa leh tura an inbuatsaih avangin Home Minister a nih angin Police hotute a biak thu sawiin R Lalzirliana chuan, "MZP buatsaihin hnam hnatlang an neih dawn avangin Zophai chhehvela police mi 50 vel silai mu tam tawk nena awmtir turin ka hrilh. MZP-te'n police-te venhimna hnuaiah chawlhbuk sak an tum ang a, Assam Police lamin an phal dawn lo, silai a puak ang," a ti.

Home Minister hlui chuan, ramri humhalh tur chuan nunna chân hialte a ṭul thei tih sawiin, "Nunna chán an awm tam lutuk hmain tlánga police awmte'n an rawn kap ang a, Assam Police-te an tlan chhe dawn a ni. An outpost-te kan luah ang a, kan ram kan zauh mai dawn a ni," a ti a; mahse, ruahmanna an siamte chu amah ráwn loa Chief Minister thupeka Kolasib DC-in Cr.PC 133 a puan avangin a hlawhtling ta lo niin a sawi.

Amah hriatpui loa Cr.PC 133 puan a nih chungchang chu Kolasib DC a zawhfiah thu sawiin Lalzirliana chuan, "Kolasib DC chuan CM thua puang a nih thu min hrilh. An puan tûk kha session lai a ni a, MLA dangte'n CM hriatpuia puan a nih thu hi min lo hrilh leh a ni. CM a lo thlenin HM hriat loa, Cr.PC 133 puan chu thil zahthlak a nih thu ka sawi. Min phiarrutu an awm tih ka hria, mahse, sorkar a mualpho a ni," a ti.

R Lalzirliana chuan, Laldenga hoa MNF-in movement an siam aia ropui Mizote'n movement ropui an neih a rin tawh loh thu sawiin, "Khatih hun laia tel ve deuh reuhin sawi nêp a tum hi mipuiteah a tla na lo. Kha movement kha sawi nêp chi a ni lo. Ralthuam nen chuan kan chhunzawm tawh lo ang," a ti a; MNF movement-in a nunpui 'tlâwm lohna' chu chhunzawm zel tur a nih thu a sawi.

MLA Lalthanliana pawhin thu sawiin, a chhuahsan tak MPC chu rilruin a hriat reng thu a sawi a, "MPC ka chhuahsan vanga rilru ná an awm chuan hriatthiam ka dil e. Party chhuahsan hial a ngai hi pawi ka ti a, party hruaitute zingah pawh pawi ti an awm ngei ang. Pawi an la ti zui zel ang," a ti.

Kohhrana rawngbawltute politics-ah an inhnamhnawih lo tura ngaihnate a awm ṭhin thu sawiin Lalthanliana chuan, "Ram chu Lalpa ta a ni, kan tih chuan politics-ah inhman a ngai. Pathian rinchhana tih a ngai a ni," a ti a; kohhran mi nih vanga politics-a beidawnga ṭhu mai mai tur kohhrana rawngbawltute chu an nih loh thu a sawi.

Inkhawmah hian MNF pre­si­dent Zoramthanga chuan R Lalzirliana leh Lalthanliana bakah, Mamit biala an party candi­date tur H Lalzirliana, Congress party general secretary RL Liantluanga leh mi dang eng emaw zat an party-ah a lawm lut a ni.