Inthlan thuchah tichhuak
Central YMA chuan nimin khan Mizoram Assembly inthlanpui neih tur pualin inthlan thuchah a tichhuak ṭhin a, "India ram puma entawn tlak inthlanna felfai leh muanawm tak kan neih leh ngei theihna turin CYMA chuan 2018 General Election atan 'Inthlan Thuchah' a siam leh a, ngai pawimawh a, zâwm ngei turin Mizoram mipui leh political party tinte a ngen a ni," an ti.
CYMA Inthlan Thuchah
1. Kan ram rorelna hi mipui siam a ni a, a chhiat a ṭhatah mawhphurtu kan ni tih hriain, khua leh tui dik takte chu vote thlak ṭheuh turin kan inngen a ni.
2. Mizo hnahthlak zingah chibing/kohhran bil inthliar hrang zawnga chetna hi CYMA chuan ṭha a ti lo a. Kan hmaa inthlanna kan neih turah pawh chutiang zawnga hma la lo tur leh chibing/sakhaw bing puala candidate siam lo turin political party leh mipui kan ngen a ni.
3. Political party hrang hrangte leh party official candidate-te'n khawtlang huapa ruai siam hi CYMA chuan ṭha a ti lo a, tumahin hetiang zawnga khawtlang huapa ruai siam lo turin kan ngen a ni.
4. Aurinna hman chungchangah, political party tinte'n sorkarin a phal dan ang bak leh khawtlang tana ninawm leh hnawksak thei tur ang chi chu tih loh hram ni se.
5. Candidate-te hi ram hruaitu turte an nih avangin zu ruih hmangte, eirûk chingte leh nungchang thlahdahte an lo awm palh a nih pawhin vote loh ngam ni se.
6. Naupang kum tling lo leh thil kalphung hre pha lote inthlan boruaka hnuh luh loh leh hmanrua a hman loh ni se.
7. Party manifesto-ah a taka tihhlawhtlin theih ngei tur chauh tarlan ni se.
8. Inthlanna muanawm, boruak ṭha tak hnuaia kan neih theihna turin thlangtu mipuite leh mawhphurtu zawng zawngte theihtawp chhuaha ṭan la turin kan ngen a ni.
9. Hmanraw thianghlim lo chelekna reng reng kan duh lo a, mi tinin an chhia leh ṭha hriatna thiang leh zalen tak hmanga vote an thlak theih nan sum leh therhlo dang hmanga vote lei leh hralh hi tih loh ni se; mipui, pawl hrang hrang leh kohhrante pawhin party leh candidate-te sum leh thil dang dil loh ni se.
10. Social media hrang hrangah thu belhchian dâwl lo leh finfiahna awm lo ang chi, party hamṭhatna atana thehdarh loh ni se.