ZPM-in sorkarna kan siam dawn - ZPM Chairman

Ṭangrual pawl, Zoram Peoples' Movement (ZPM) Steering Com­mittee chairman Lallian­sawta chuan nimin khan an pisaa inkhawmah thu sawiin, ram rorelna ṭha leh dik nei turin dan siamtu legislator-te'n Pathian an ṭih a pawimawh thu a sawi a, Mizoram inthlanpuiah ZPM-in sorkarna an siam ngei dawna a lan thu a sawi bawk.

Lalliansawta chuan, district council pathum tih lohah chuan ZPM-in bial viltu vuah vek tawh a, district council chhunga constituency pangaah pawh Pathianin rem a tih bial viltu dah thuai tum a nih thu a sawi a; ZPM thlawptu leh duhsaktute chu bial vil­tute tisa leh thlarau lam mamawh dila ṭawngṭai ṭhin tura sáwmin, “ZPM chhungkua hi kan inpum­khatna a ṭha a, Pathian leh mipui zarah kan sorkar ngei dawn a ni," a ti.

ZPM Chairman chuan, ram rorelna ṭha leh dik nei turin dan siamtu legislator-te'n Pathian an ṭih a pawimawh thu a sawi a; amah chu Mizoram BJP President-in telephone hmanga a biak thu sawiin, "Kan hma lawka inthlannaa thawhho an duh a ni," a ti. "ZPM leh BJP-te chuan Congress leh MNF-te hi sorkar tir chi-ah kan ngai tawh lo ve ve a ni," a ti bawk.