Mizoram sorkarin private school 76-te Lumpsum grant-in-aid dinhmunah a dah

Mizoram sorkar chuan private school 76 - middle school pasarih, high school 26 leh higher secondary school (HSS) 43 chu tun hnai khan lumpsum grant-in-aid dinhmunah a hlangkai. Lumpsum grant-in-aid school-te hnena ṭanpuina pek zat a tipung bawk.

School Education department-in October 5, 2018-a hriattir (notification) a chhuah danin, lumpsum grant-in-aid din­hmuna sikul 76 hlânkai leh ṭanpuina sum pek zat tihpun chu October 1, 2018-a Cabinet meeting thutlukna anga tih a ni a; dan tlawhchhan chu - The Mizoram Education (Grant-in-Aid for General Main­te­nance of Private Schools) Rules, 2006 a ni.

Notification chhuah thar ang chuan, lumpsum aided middle school hnena kum khata ṭanpuina sum pek ṭhin Rs. 1,20,000 chu Rs. 2,00,000-ah tihpun niin, lumpsum high school hnena Rs. 1,20,000 pek ṭhin chu Rs. 2,50,000-ah tihsan a ni a; lumpsum aided HSS hnena Rs. 1,50,000 pek ṭhin chu Rs. 3,00,000-ah tihpun a ni thung.

Private school ni ṭhin, lumpsum aided school-a dah tak M/S pasarihte chu - New Com M/S (Khawzawl Dar­ngawn Veng), N.Khawbung English Medium School, Vapar English Medium School, Zokhawthar English Medium Schooo, NM English Medium School (Marpara), MHIP English Medium School (Bualpui-V) leh, Thiltlang English Medium School-te a ni.

Private high school 26 chu lumpsum grant-in-aid dinhmunah dah thar a ni a; chu'ngte chu Aizawl district-a mi paruk, Lunglei district-a mi pahnih, Champhai district-a mi 10, Serchhip district-a mi pathum leh Lawngtlai district-a mi pangate a ni. District pathum - Siaha, Kolasib leh Mamit district-ah private school upgrade a awm lo.

Private higher secondary school 43, lumpsum aided-a dah thar zinga a tam zawk chu thingtlanga mi a ni a; Aizawl district-a HSS pakua, Lunglei district-a HSS 11, Siaha district-a HSS pakhat, Champhai district-a HSS pakua, Kolasib district-a HSS pahnih, Serchhip district-a HSS panga leh Lawngtlai district-a HSS parukte a ni.

Private school 76-te lumpsum grant-in-aid dinhmuna hlankai a nih a, kum khata ṭanpuina sum Mizoram sorkarin kum khat chhunga a sên belh tur zat chu Rs. 2,08,00,000 (nuai 208) a ni a; chu'ngte chu middle school pasarih tan Rs. 14,00,000, middle school 26 tan Rs. 65,00,000 leh higher secondary school 43 tan Rs. 1,29,00,000 a ni.

Hetih lai hian, lumpsum aided dinhmuna awm mek higher secondary school pakuate leh middle school leh high school 60 chuangte chu dinhmun sang zawk, adhoc grant-in-aid dinhmunah hlankai an nih loh thu leh, adhoc/deficit-a awm mekte pawh dinhmun sang zawka dah (provincialised) an awm loh thu School Education department hotute chuan an sawi a; lumpsum aided ni mek sikulte hnenah pawh tuna lumpsum rate siam thar ang chu pek a nih tur thu an sawi bawk.