Bru camp-a E.Roll hearing tih duh loin Kolasib-ah lungawi lohna an lantir
Mizo Zirlai Pawl (MZP) headquarters, Kolasib chuan Mizoram electoral roll-a Bru-te thun tumna awm mek duh loin nimin khan Kolasib-ah lungawi lohna an lantir a; Kolasib College aṭanga DC pisa bul thleng kawng an zawh bakah, DC pisa tualah sit-in demonstration an nei.
Sit-in demonstration neihna hmunah hian Kolasib MZP president Zosangliana Rokhum-in thu a sawi a; Mizoram electoral roll revision hearing-a inlan duh lo Bru-te electoral roll-a dah luh tumna a awm chu an dodal tih sawiin, a ṭul chuan na zawka kal zel an hreh lo tih a sawi.
MZP adviser C Zomuanpuia pawhin thu sawiin, Bru-te chu anmahni duhthu ngeia Mizoram chhuahsan an ni tih a sawi a, "October 21, 1997-ah Lalzawmliana, Forest department-a game watcher hna thawk chu Damparengpuiah Bru National Liberation Front (BNLF)-te'n an that a, chumi hnuah anmahni duhthu ngeiin Mizoram chhuahsan turin an mite an hriattir zui a ni," a ti.
C Zomuanpuia chuan, Bru-te'n kum 21 Mizoram an chhuahsan chhungin Mizote tan a hnawk thei ang berin an khawsa reng tih sawiin, "Sorkar laipuiah a chhe thei ang berin Mizote hêk chungin, an lo kir lehna turah mipuite'n kan dodal lo a, amaherawhchu, ṭum tam tak hruai kîr tuma an ni chungin anmahni lamin an ṭhulh leh ṭhin a ni," a ti. Bru-te chu Mizoramah an let an remti a, Mizorama kîr duh lote electoral roll-a thun luih tumna awm erawh an remti lo tih a sawi bawk.
Kolasib-a kawngzawh leh sit-in demonstration-ah hian zirlai 300 vel an pungkhawm a; resolution pass in, district election officer Dr Arun T awm rih loh vanga a aiawhtu additional DC Lalṭanpuia Hnamte hnenah resolution an hlan a ni.
Kolasib MZP Resolution
1. Hearing neihnaa inlan duh lo Tuikukte Tripura-a zuk kal chilh hi engtik lai mahin kan remti lo.
2. Mizoram mi leh sa ni duh lo Central-a a chhe thei ang bera min hék ṭhintute hi Mizoram mi leh saah kan pawm thei lo.
3. Mizoram tibuaitu mikhualte lakah Mizo mipuite ṭangho zel turin MZP chuan a sawm che u a, hetiang mite dodal tur hian MZP chuan ke a pên zel dawn a ni.
4. Tuna kan hmalaknate hian awmzia a neih loh chuan Kolasib district-a zirlaite'n vote kan thlak lo ang.