BSF-in zirlaite inelna an buatsaih

Nimin khan 61st. BN BSF hmunpui, Lunglei Zoltangah Police Commemoration Day pualin zirlaite tan essay writing, drawing, debate leh quiz hmangin intihsiak buatsaih a ni a; 2nd. Bn. MAP commandant Lalmuanpuia khuallian a ni.

Lalmuanpuia chuan, October 21, 1959-ah Ladakh (Indo-Chinese) border-ah police duty lai eng emaw zat kah hlum an ni tih sawiin, chuta ṭang chuan India ram pumah Police Commemoration Day hman a nih tak thu a sawi a; intihsiaknaa tel zirlaite chu ram roreltu an la nih dawn avangin, taima taka zir tur leh khawtlang leh ram leh hnam chhawr tlak nih tuma ṭan la ṭheuh turin a fuih.

61st Bn BSF 2nd. in command Sukvinder Singh pawhin thu sawiin, BSF-te chuan ramri vên ringawt ni loin, mipuite nena thawhhona ṭha an nei a, ram rawngbawlna hrang hrang Swachh Bharat Mission te, medical camp te, ruihhlo dona kawngzawh te, SSC training-te leh mipuite tana ralthuam pholanna an buatsaih ṭhin thu a sawi.

Intihsiaknaah hian Lunglei Higher Secondary School, Baptish Higher Secondary School, Leitlangpui Higher Secondary School leh Kendrya Vidhalaya School zirlaite an tel. Essay leh drawing-ah Baptist HSS pakhatna an ni a, debate leh quiz-ah Kendrya Vidhalaya School pakhatna an ni thung.