Zirlai intodelh 3 hnenah chawimawina hlan

Students' Self-Support Union (SSU) chuan nimin khan Lal Thanhawla Auditorium-ah General Assembly vawi 33-na an hman chhawnzawm a, Mizoram sorkara secretary Dr C Vanlalramsanga chu khuallian niin, zirlai mahni intodelhte chawimawina, Self-Support Award mi pathum hnenah an hlan.

SSU Assembly first session chu vice president PC Lalawmawia'n a kaihruai a; Dr C Vanlalramsanga chuan, zirlai mahnia intodelhte chu ram leh hnam nghahfâk dik tak an nih thu leh ram leh hnam siamṭhatu tur dik tak an nih thu sawiin, "Mizoram hi kan ram neih chhun a ni a, siamṭhatu tur kan ni," a ti a, zirlaite chu hmasawnna duh tlat tur te, taima taka thawkrim tur leh rinawm tlat turin a fuih.

Khuallian hian zirlai ni chunga mahni intodelhte hnenah Self-Support Award 2018 a sem a; J Thankima College-a zirlai Lalhruaitluanga, Champhai College zirlai Lalchhanhimi leh Hrangbana College zirlai Nicky Malsawm­tluanga-te hnenah hlan a ni. Award hian Rs. 1,00,000 leh thuchei a keng.

SSU president PC Lalramengmawia pawhin thu sawiin, "Zirlai ni chunga intodelh hi thil harsa a ni lo a, kan nun thlenga min hruaitu a ni," a ti.

Chawhnuah Vangpui Kût an hmang a, Aizawl Municipal Corporation commissioner Dr H Lalthlangliana chu Kût Pa a ni.

SSU hian kum 2018-20 chhung office bearer turte an thlang a, president atan Lalnunhlima an thlang a ni.