Dr BD Chakma MLA aṭangin a bang ; Sorkar term kal laiah MLA 4 an báng tawh

Tuichawng bialtu MLA, Dr Buddha Dhan Chakma chuan nimin khan Assembly speaker Hiphei hnenah MLA aṭanga bànna a thehlut. BD Chakma nen hian tun sorkar term kal mekah Member of Legislative Assembly (MLA) paliin MLA aṭanga bànna an thehlut tawh. Mizoramin MLA a neih hnua an term hmang zo loa MLA an bàn tam ber ṭum a nia thu dawn a ni.

Dr BD Chakma hian speaker Hiphei hnena MLA aṭanga bànna a thehluh zawhah Congress party President hnenah an party aṭanga bànna a thehlut nghal bawk a; Bharatya Janata Party (BJP) a zawm dawn.

Bànna a thehluh zawha Vang­laini palai zawhna chhangin Dr BD Chakma chuan, inthlan a hnaih tawh avangin MLA nihin awmzia a awm tawh chuan loh avangin bànna thehlut a nih thu a sawi a, "Political party hrang hrang aṭangin sàwmna ka dawng reng a, Congress party-ah ka bàn fel hnuah ka zawm turah thutlukna ka siam ang," a ti.

Dr BD Chakma chuan, Congress party-ah lungawi lohna a neih thu sawiin, "Chakma Congress-ah inlungrual lohna a awm a, vawi eng emaw zat kan party President hnenah discipline kengkawh turin ka thlen a, tun thlengin hmalakna a awm lo. Chuvangin, Congress party aṭanga bànna ka thehlut a ni," a ti a; Chakma Autonomous District Council (CADC) area-ah Congress party tan tlin a beiseiawm loh niin a sawi.

Nimin tlaia Hotel Regency-a thuthar thehdarhtute a kawmnaah Dr BD Chakma hian BJP a zawm tur thu a puang a, vawiinah lawmluh a ni ang. BD Chakma hi kum 2013 khan a ṭum khatna atan INC ticket-in Tuichawng bial aṭangin MLA atana thlan a ni.

Mizoram Legislative Assembly pasarihna term kal mek chhungin sorkar lai INC MLA paliin MLA aṭanga bànna an thehlut tawh a; chungte chu - Aizawl North-III bialtu MLA Lal Thanzara, Tuichâng bialtu MLA Lalrinliana Sailo, Ṭawi bialtu R Lalzirliana leh Tuichawng bialtu Dr BD Chakma te an ni. Lal Thanzara hian August 18, 2015-ah MLA aṭanga bànna a thehlut a, chumi avanga bye-election neihah a tling zui leh nghal thung.

Lalrinliana Sailo chuan October 3, 2018-ah MLA aṭanga bànna a thehlut a, R Lalzirliana'n October 12-ah MLA aṭanga bànna hi thehlutin, Dr BD Chakma chuan nimin khan bânna a thehlut ve leh a ni. Hun a awm tawh loh avangin heng bial pathumah hian bye-election buatsaih a ni dawn lo.

Mizoram Assembly pasarihna chhungin bye-election ṭum hnih neih a ni a; Lal Thanzara a bàn avangin Aizawl North-III ah November 21, 2015 khan bye-election neih a ni a, Lal Thanzara a tling nawn. Hrangturzo bialah pawh bye-election buatsaih a ni a; bye-election buatsaih a nih chhan chu - INC candidate Lal Thanhawla Serchhip leh Hrangturzo bialah a tling kawp a, Hrangturzo bial a chhuahsan vang niin, bye-election-ah INC candidate Vanlalawmpuii Chawngthu a tling.

Tun term chhung vekin minister aṭanga bànna mi pali - Lal Thanzara, Lalrinmawia Ralte, R Lalzirliana leh Dr BD Chakma ten an thehlut a, an vai hian pawmsak an ni. Lal Thanzara'n August 18, 2015-ah bànna a thehlut a, Lalrinmawia Ralte-in February 15, 2017-ah, Dr BD Chakma-a'n August 21, 2017-ah leh R Lalzirliana'n September 14, 2018-ah banna an thehlut.

Lal Thanzara hi MLA leh minister (minister of state) aṭanga a bàn kawp hnua bye-election-a thlan tlin a nih leh hnuah cabinet minister atan lak luh a ni.

Tun term-ah vek hian parlia­mentary secretary pasarih - KS Thanga, Lt.Col. ZS Zuala, H Zothangliana, Joseph Lalhimpuia, Hmingdailova Khiangte, TT Zothansanga leh K Lalrinthanga te ruat an ni a; an vai hian August 30, 2017 khan parliamentary secretary aṭanga bànna chief minister Lal Thanhawla hnenah an thehlut a, Chief Minister-in an vaiin a pawmsak a ni.