KHAWTHLIR
Thisen pe
Khatla Presbyterian Kohhran chuan an kohran golden jubilee lawm nan nimin khan blood donation camp an huaihawt a, an kohhran mi mipa 25 leh hmeichhia pasarihte'n Synod Hospital tan thisen unit 32 an pe. Mizoram UPC ṭhalai, PYD Bilkhawthlir bial pawhin nimin khan Kolasib District Hospital tan Bilkhawthlir Kualmawi YMA Hall-ah thisen unit 33 an pe a, a petute mipa 23 leh hmeichhia 10 an ni.
Damdawi-in enfiah
Kayakalp hnuaia State External Accessor Team chuan October 15, Thawhṭanni khan faina leh thianghlimna kawnga Mamit District Hospital dinhmun an enfiah. Swachh Bharat hnuaia damdawi-inte faina leh thianghlimna kawnga hmasawnna turin inelna thianghlim Kayakalp hi kum 2015-ah India ram pumah ṭan a ni a; Mamit District Hospital hian lawmman ṭum thum a la tawh a ni.
Lak luh khap
Lunglei DC chuan thupek chhuahin, Lunglei district chhungah vawk natna, PRRS a la lêng mek tih hriat a nih thu a tarlang a, "Hei vang hian district páwn aṭanga vawk lak luh khap a ni. Vawk thi reng reng phûm tur a ni a, vawk hrisel chauh talh tur a ni," a ti. Thupek hian thla hnih chhung a huam ang.
Exhibition hawng
PC Zomuana'n S&S Arts Gallery, Zarkawta a buatsaih Solo Sculpture Exhibition chu nimin khan IPR director David L Thangliana'n a hawng a, Mizo zinga solo sculpture exhibition nei thei an awm chu lawmawm a tih thu a sawi. Exhibition hian October 19 thleng a awh dawn a, thil chi hrang hrang 50 vel pholan a ni.