ECI hotute'n Mizoram enfiah

Election Commission of India (ECI) hotute chuan nimin khan chief election commissioner (CEO) Om Prakash Rawat hoin Aizawl an rawn thleng a, November 28, 2018-a Mizoram Assembly inthlan awm tura inbuatsaih dan an rawn enfiah. ECI hotute hnenah hian Central YMA hruaitute chuan Tripura-a Bru camp-ah vote thlak an remtih loh thu an thlen.

ECI team-te hi Raj Bhavan-ah thlentir an ni a, nimin khan political party hrang hrang aiawhte an kawm bakah, Chief Electoral Officer hoin sorkar official hotute an kâwm a, NGO Coordi­nation Committee hruai­tute'n an kâwm bawk.

NGO Coordination Co­mmittee chuan ECI hotute hnenah hian Tripura-a Bru relief camp-a electoral roll ennawnna (revision) nei tura ECI-in Mizoram sorkar a rawn hriattir chu ṭha lo an tih thu leh an lawm loh thu an thlen.

Jt. NGO-te hian Tripura-a camp-ah engti kawng mahin vote thlaktir an remtih loh thu an hrilh bakah, Mizoram páwna vote thlaktir lo turin kum 2014-ah ECI hotute'n thutiam (commitment) an neih tawh thu an hrilh bawk.

Joint NGO chairman leh Central YMA president Vanlalruata chuan Vang­laini zawhna chhangin, ECI hotute hnenah hian, Tripura chu India ram chhung tho a nih avangin Bru-te chu Mizoramah an kîr duh lo a nih chuan Tripura-ah an awm hlen theih reng thu an sawi a, "Tuna Tripura camp-a Bru awm zat aia tam Mizoramah Bru an awm a, Mizorama Bru-te hian harsatna an tawk lo tih kan hrilh," a ti.

Vanlalruata chuan, "Bru-te chu fapa sual ang an ni a, ECI-in in lo chhan zel chuan mi dangin fapa sual an lo chhan zel ang in ni, kan ti a. Bru lak letna tura inremna (agreement) pawh Bru-te hian an zah lo a, an zawm lo a; hei hi mi tlemtêin an mimal hamṭhatna an ûm vang a ni tih kan hrilh," a ti bawk.

Ruahman lawk dan chuan, ECI hotute hian vawiin chawhma dar 11:45 hian Aijal Club-ah thuthar thehdarhtute an kâwm dawn a, chumi hnuah New Delhi panin Mizoram an chhuahsan ang.