Bilkhawthlir rama mimal kawng laih sa Sorkarin NLUP hnuaia laih angin a chhál

Zoram Peoples' Movement (ZPM) ṭha­laite chuan, Lalhmangaiha, Bilkhawthlirin a sum senga kawng a laih chu Mizoram sorkar­in NLUP hnuaia sorkar kawng laih anga a tarlan avangin kawng laitu Lalhmangaiha'n hun rei tak chhung chaw a nghei phah tih an sawi a; Lalhmangaiha sum lo sen tawh chu rùl tur leh a kawng laih sum siam nana hmangtute hrem turin sorkar an phût.

ZPM ṭhalaite hian nimin khan Aizawl Press Club-ah thuthar thehdarhtute an kàwm a; ZPM ṭhalai president Malsawmzuala chuan, VL Hmangaiha chuan a kawng laih sa sorkarin NLUP hnuaia hna thawh angah a tarlan avangin a sum senso, JCB hman man tal pe turin Mizoram sorkar a phût a, sorkar lamin an pek loh avangin September 30, 2018 tlai aṭanga chaw a nghei ṭan tih a sawi.

Malsawmzuala chuan, VL Hmangaiha (55) chu a chawngheina hmun Bilkhaw­thlir leh North Chhimluang inkara Saihapui kâwnah an tlawh a, thil awm dan an zawtfiah tih a sawi a; "Pu VL Hmangaiha hian a lo thawh hah man phuhrûksak ngei turin sorkar kan phût. A senso zawng zawng kha hmu let leh ngei se, a tha sên hmanga sum lo siamtute'n an phu tâwk hremna tuar ngei se kan ti bawk," a ti.

ZPM ṭhalai hruaitute sawi danin, VL Hmangaiha hian Bilkhawthlir khaw ram, Saihapui kâwn, Buhngah phei leh Hmarluang hnár vela ram neitute nen inberemin, ama sumin kum 2014-ah kawng a lâi a, ram neitute mau chu a chansak thung. Kawng chu hmun pahnihah a lai a, km 2. aia thui ve ve a ni. Kawng laih nan hian cheng nuai 23-24 vel a sêngin a inhria.

Kum 2016-17 chhunga NLUP hnuaia Horticulture department-in link road a laih zingah VL Hmangaiha kawng laih sa chu telh a ni tih RTI Act hmanga zawhna chhanna aṭangin finfiah a ni. Horticulture department chuan, kawng laihna atan June 2016-ah cheng nuai 10 Kolasib DHO-Kolasib-ah a pe chhuak a, March 2017-ah kawng km. 2 laihna senso atan cheng nuai 10 a pe chhuak leh bawk.

VL Hmangaiha'n kawng a laih zawh hnu, kum 2015-ah sorkarin mau permit a titawp leh si avangin sum eng emaw zat a séng thlawn a ni. Chutih lai chuan, a kawng laih sa chu sorkar (Horticulture)-in departmental work anga chhála sum a pek chhuah leh si avangin, a senso zualpui, JCB a hman man tal pe turin sorkar a phût a, chaw a nghei ta a ni.

VL Hmangaiha hian nimin thleng khan chaw a nghei a, a thil phût chu sorkarin a tihhlawhtlin loh bakah a ngaihsak lo tih ZPM ṭhalai hruaitute chuan an sawi a; Hmangaiha chu chhungkaw châwmtu ber a nih avangin a phût ang sorkarin tihpuitlinsak lo mah se, nimin tlai aṭang khan chaw nghei a titawp niin an sawi bawk.

ZPM ṭhalai President chuan, Mizoramah a thei fate'n awlsam taka sum an siam zung zung laiin, a thawkrim zawkte chan a chhe tulh tulh tih sawiin, "ZPM policy hmanga her danglam kan châk tawh hle a ni," a ti. VL Hmangaiha chunga thil thleng chuan sorkarin kut hnathawktute a ngaih pawimawh lohzia leh an thawhrim rah pawh sum siam nan a hmang duh zel tih a tilang chiang hle tih sawiin, "Hei hi mihringpuite rahbehna leh inhmuhsitnaah kan ngai a, kan sorkar thil tih dan hi kan dem tak zet a ni," a ti.

Malsawmzuala chuan, Mizorama kut hnathawktute khai chhuak turin ZPM chu an inpeih tih sawiin, ZPM a sorkar ngei a ṭul avangin Mizoram mipuite thawhpuina a ngen a; Assembly inthlanpui awm turah ZPM-in BJP an thawhpui dawn lo tih a sawi bawk.