Tlabung MZP-in ACB-ah FIR thehlut

Mizo Zirlai Pawl (MZP) sub-headquarters, Tlabung chuan National Highway no. 302 siam hna thawk mektu contractor pathum zinga pakhat, GP Project Ltd. lakah nimin khan Anti-Corruption Bureau (ACB)-ah FIR an thehlut.

Tlabung MZP hian Tlabung leh Lunglei inkalpawhna kawngpui, NH-302 siamna atan GP Projects-in sum an sên tawh zat nia an sawi cheng nuai 480 chu an hnathawh tawh dan inmil loin an hria a, chuvang chuan ACB-ah FIR an thehlut a ni. GP Project-in sum an hman tawh zat an tarlan chungchangah thil felhlel a awm ngeia an hriat thu sawiin, "Thil awm dan chiang zawka chhui chhuak ngei turin kan ngen a ni," an ti.

FIR thehluttu Tlabung MZP president P Vanlallawma chuan, Tlabung-Lunglei NH-302 chu package pathum­ah ṭhen a nih thu leh, package tawp ber changtu GP Projects chu hna thawk muang ber an nih thu a tarlang.

Tlabung MZP tarlan danin, GP Projects hian December 21, 2018 hmain kawngpui siam hna hi an thawk zo tur a ni a, mahse, tun dinhmunah chuan lirtheia kal hleih theih lohna a la tam hle. An thawh tur chin siam ṭhat nan cheng vbc. 18.16 (Rs. 18,16,65,519) dah a ni.