Sorkar mek party-te zawm tur tarlang

Sorkar thuchhuah chuan, Mizoram Legislative Assembly pariatna din tura inthlanpui awm tura Model Code of Conduct chungchang a tarlang a; chu'ngte chu political party-te leh candidate-te zawm tur a nih thu tarlan a ni. Tun ṭumah hian sorkarna chelh mektu party-te zawm tur tarlan a ni.

1. Central/state sorkara rorel lai party chuan inthlan campaign beih nan an lalna/nihna (official position) an hmang tur a ni lo.
2. Minister-te'n official visit leh election campaign an nei kawp tur a ni lo a, inthlan campaign nan sorkar hnathawkte an chhawr tur a ni lo.
3. Rorel lai party-te hlâwkna leh hamṭhat nan sorkar thil - thlawhtheihna, lirthei, hmanrua leh mihring hman loh tur a ni.
4. Rorel lai party-in election meeting neihna atan vantlang hmun (public place) te, election thila zin vel nan thlawhna ṭumhmunte an pumbilh tur a ni lo a; chutiang hmun leh thil dangte pawh candidate/party dangte'n ruling party-te ang chiahin an hman phalsak tur a ni.
5. Rest house, bungalow leh sorkar in dang reng reng pawh rorel lai party emaw, an candidate emaw ten an pumbilh tur a ni lo a, chutiang hmunte chu party/candidate dangte pawhin rualkhai takin an hmang ve tur a ni. Eng party/candidate mahin sorkar in leh hmunhmate campaign office atan emaw, election thila public meeting neih nan emaw hman phal a ni lo.
6. Sorkar sum ringa chanchinbu leh hmanraw dang hmanga inpuanzar (advertisement) te, rorel lai party-te hlâwkna tura an hlawhtlinna thu sorkar hmanraw hmanga puanzarte hi election hun chhung chuan tih miah loh tur a ni.
7. Election Commission-in inthlan thu a puan ní aṭanga chuan minister emaw, thuneitu dang emaw tumahin ṭanpuina sum (grants/payment) an sem chhuak tawh tur a ni lo.
8. Election Commission-in inthlan a puan ní aṭangin minister emaw, thuneitu dang emaw tumahin:-
a) Suma ṭanpuina (financial grant) chi reng reng leh chutiang tihsak tura intiamna ṭawngkam an chhâk chhuak tur a ni lo.
b) Eng project/scheme atan mah lungphûm (foundation stone) phûm leh a dangte tih loh tur a ni.
c) Kawng sialna tur emaw, tui in tur ngaihtuahsak leh a dangte pawh an tiam (promise) tur a ni lo.
d) Party-in vote a hmuh phah theihna thilah chuan sorkarah leh sorkar hmalakna reng rengah tumah hnaah appoint loh tur a ni.
9. Central/state sorkara minister-te chu candidate/voter/authorised agent an nihna hmunah chauh lo chuan polling station-ah emaw, vote chhiarna hmunah emaw an lut tur a ni lo.