Khaw tinah Congress an harh chhuak mek - Zodintluanga

Congress party-a Campaign Committee chairman Zodintluanga, Congress Legislature Party (CLP) treasurer ni bawk chuan nimin khan Baktawng community hall-a Tuikum Block-II Campaign Kick-Off ah thu sawiin, Congress party sáipui mu lai a tho a, khaw tinah Congress party an harh chhuak mek niin a sawi.

Zodintluanga chuan, Congress harh tharnain Mizoram a fan chhuak mek nia sawiin, "Tun hnaiah MNF-te'n an thli a tlehah an inngai a, Congress party kan la chet chhuah loh vang mai a ni. Tunah chuan Congress party saipui mu lai a tho a, harh tharna a thleng a, khaw tinah Congress party an harh chhuak mek a ni," a ti.

Congress party hotute'n ruahmanna fel tak nei takin ro an rel ṭhin nia sawiin Zodintluanga chuan, "A hun takah ngun takin kan hotute'n ro an rel a, bial tin deuh thawah Congress mipuite'n harhna changin Zoram hmun tinah Congress sorkar leh turin a inpuahchah leh ta mek a ni," a ti. Candidate ruat kawngah tun ṭum anga candidate ruat fuh a tam lo nia sawiin, MNF-in MLA panga an neih sate chu kumin inthlanah an tla vek dawn niin a sawi.

Zodintluanga chuan, MNF party leh an president Zoramthanga chu mipuiin an hnâwl tawh a, an dingchhuak tawh dawn lo nia sawiin, "MNF president Pu Zoramthanga hi a pian leh mûrna lam East Tuipui leh Champhai bial pathumah an hnawl tawh hnu a ni a, tuna a dinna tur Aizawl East-I ah a tlin ngawt chhan tur a awm lo," a ti bawk.

Inkhawmah hian Tuikum biala Congress candidate Sangzela Tlau pawhin thu a sawi a ni.