Police-te'n kum 2019 hnu lamah Kuhva kg. 9,13,930 an man tawh

Mizoram Police-te chuan kum 2019 aṭanga kumin February 3 thleng khan Myanmar aṭanga dan loa kuhva rah tawlh rûk ṭum 69 an man tawh a, an man zat belh khawm chu kg. 9,13,930 a tling.

Police Headquarters-a SPIO-in RTI Act hmanga zawhna a chhan danin, Mizoram police-te chuan kum 2019 khan Myanmar aṭanga kuhva rah tawlh rûk ṭum hnih manin, an man zat chu kg. 81,600 a ni a; kum 2020 khan ṭum 39 manin, an man zat chu kg. 3,40,620 a ni.

Kum 2021 khan ṭum 24 manin, an man zat chu kg. 4,70,510 a ni a; kumin 2022-ah ṭum thum man tawhin, an man zat chu kg. 21,200 a ni. Kumina ṭum thum an man tawhnate chu - Rabung kawngah te, Tualte khuaah leh Chhingchhip Venghlunahte a ni.

Myanmar deptu district, Champhai district-ah kum 2019 khan ṭum khat manin, kg. 2,000 man a ni a; kum 2020 chhungin ṭum 28 manah kg. 1,09,140 leh kum 2021 chhungin ṭum 10 manah kg. 85,790 man a ni. Kumin 2022-ah man a la ni lo. Kum 2019 aṭanga Champhai district-a man tawh zawng zawng chu kg. 1,96,930 a tling.

Khawzawl district-ah kum 2020 chhung khan ṭum ngaah kg. 1,09,680 man a ni a, kum 2021 chhungin ṭum ngaah kg. 2,62,560 leh kumin 2022-ah ṭum hnihah kg. 11,600 man a ni tawh a; a vaiin kg. 3,83,840 niin, kuhva rah man tamna ber district a ni.

Saitual district-ah kum 2019 chhung khan ṭum khatah kg. 79,600 man a ni a, kum 2020 chhungin ṭum li-ah kg. 97,280 leh kum 2021 chhungin ṭum rukah kg. 74,160 man a ni bawk a; kum 2019 hnu lama man zawng zawng chu kg. 2,51,040 a ni.

Aizawl district-ah ṭum hnih man a ni tawh a, man zat chu kg. 29,600 a ni. Serchhip district-ah kum 2020 chhungin kg. 24,520, kum 2021 chhungin kg. 18,400 leh kuminah kg. 9,600 man a ni tawh a, a vaiin kg. 52,520 a tling.

Police SPIO chuan, dan loa kuhva rah tawlh rûk police-te'n an mante chu Customs-ah an hlan ṭhin thu a tarlang a ni.

Mizoram Police-te chuan kum 2019 aṭanga kumin February 3 thleng khan Myanmar aṭanga dan loa kuhva rah tawlh rûk ṭum 69 an man tawh a, an man zat belh khawm chu kg. 9,13,930 a tling. A hnuaia mi hi an manna hmun, man ni leh man zat kimchang a ni.