Presbyterian tualchhung kohhran 118-te'n Covid-19 ṭanpuina Rs11,28,10,504 an pe

Mizoram Presbyterian Koh­hrana tualchhung kohhran 118-te chuan Covid-19 kaihhnawiha chhawmdawlna atan Rs 11,28,10,504 an pe chhuak a, Mizo­ram Synod-in Rs 58,15,000 a pe chhuak bawk a, a vaiin Rs 11,86,25,504 a tling.

Mizoram Synod hruaitute leh Governor Dr Hari Babu Kambhampati chu nimin khan Raj Bhavan-ah an inkâwm a; mipui vantlang tana hmalakna ṭangkai tur leh tunlaia Mizorama thil thleng pawimawhte an sawiho.

Synod hruaitute sawi danin, Covid-19 hripui léngah Mizoram Presbyterian Kohhrana tualchhung kohhran eng emaw zatin mi harsate leh ṭanpui ngaite pualin sum an theh chhuak a, chutianga ti zinga kohhran 118-in Synod-ah report an thehlut a, report lem lo eng emaw zat an awm bawk.

Presbyterian tualchhung kohhran 118-te'n March-December, 2020 chhungin chhawmdawlna atan Rs 4,36,65,288 leh January-November 29, 2021 inkarah Rs 6,91,45,216 an pe chhuak a, a vaiin Rs 11,28,10,504 (nuai 1128.10) a ni.

Synod sumpui aṭangin Covid-19 chhawmdawlna atan Rs 58,15,000 pek chhuah a ni a, tualchhung kohhran 118-te nena an pek belh khawm chu Rs 11,86,25,504 (nuai 1186.25) a tling.

Governor chuan, Mizorama kohhran leh tlawmngai pawlte'n mipui hmasawnna atan ṭha taka sorkar an thawhpui ṭhin avang te, anmahni senso nena state hmasawnna atan an luang chhuak ṭhinte chu state danga NGO leh sakhaw dang vuantute tan entawn tlak a nih thu a sawi.

Dr Hari Babu Kambhampati chuan, Mizoramah mi chi hrang hrang a kâwm tawh a, hmun hrang hrang a tlawh tawh tih sawiin, mipui mimir tam zawkin central scheme ṭha tak tak, mi harsate chawikanna turte an hriat loh bakah an dawng lo tih a hmuh thu a sawi a, "Central welfare scheme tam tak hi Mizo mipuite'n dil nacháng an hriat loh chhan chu zirtirna pek ṭhat tawk loh vang a ni," a ti.

Synod hruaitute chuan, Mizo­ram sorkar leh kohhrante chu eng lai pawha Mizoram hmasawnna tura lungrual taka thawkho ṭhin an ni tih an sawi a; Mizorama remna leh muanna a awm theih nan te, zirna, inthlanna thianghlim, mipui vantlang tana luan chhuahna leh sorkar thlàwp a ngaihna laiah theihtawp an chhuah zel thu an sawi bakah, Kristiante'n India ram hmun ṭhenkhata harsatna an tawh thute an sawi bawk.

Inkawmnaah hian moderator Rev. Dr Vanlalnghaka Ralte hoin Synod puipate an tel kim a ni.