KHAWTHLIR

Sericulture dept & Lenbuang-in Thuthlung ziak
Sericulture department leh Lenbuang Handloom & Handicrafts chuan nimin khan thawhhona thuthlung, Memorandum of Understanding (MoU) an ziak. Thuthlungah hian Sericulture director Lalrozama leh Lenbuang neitu K Lalmuanpuii ten hming an ziak a; MLA Dr Vanlalthlana chu hriatpuitu a ni. Thawhhona thuthlung hnuaiah hian Sericulture department-in Lenbuang hnuaia puantahtute hnenah a thlàwnin silk là an pe ang a, an tah zawhah Sericulture department-in silk la man paihin, a leisak leh dawn a ni.

Kawng hawng
AMC executive councillor Laltlanzova Khiangte chuan nimin khan Sihpui leh Ṭhuampui inkar kawng Rs 44,67,700 sénga zauh a hawng. Laltlanzova chuan, a bial, Ward-IV chu bial êng ber, fai ber leh hmasawn ber nih tumin theihtawp a chhuah tih sawiin, "Kar leh lamah Ramthar North veng thlang lamah internal road hna ṭan leh hman beisei," a ti.

Lawngtlai DC-in chah
Lawngtlai DC Dr Andrew H Vanlaldika hoin nimin khan Lawngtlai district-a telecommunication service provider-te leh Power and Electricity department hotute'n phone leh internet tihchangtlun dan tur an sawiho. Service provider-te chu mipui harsatna rang taka chinfel kawngah hmasawn tum turin an chah a ni.

Vawktê hlân
AH&Vety department chuan FOCUS project hnuaiah nimin khan Champhai Vety Complex-ah Pig Progressive Farmers mi 18 hnenah vawktê paruk ṭheuh an hlan. Vawk vulh inzirtirna hun hman nghal a ni a, mi 63 hnenah vawktê pahnih ṭheuh leina tur piglet subsidy pek a ni bawk.

Pianpui Tawng Ni
Mizoram University-a Mizo department chuan nimin khan internet kaltlangin International Mother Language Day (Pianpui Ṭawng Ni) an hmang. He hun hi MZU Mizo department HoD Dr Ruth Lalremruati'n a kaihruai a, Prof. Laltluangliana Khiangte leh Prof. RL Thanmawia ten thu an sawi a ni.