Kamrul-a dilnaah hma la thuai turin CYMA-in sorkar an ngen

Central YMA chuan, Kamrul Laskar (Kamlova Chhangte)-in a schedule tribe certificate titawp tura dilna a thehluh tawhah a rang thei ang bera hma la zui turin Mizoram sorkar an ngen.

CYMA thuchhuah chuan, Kamlova Chhangte (Kamrul Laskar)-in ST certificate a neih ṭhiahsak tura Aizawl DC an ngenna chuan rah ṭha a chhuah zela an hriat thu leh lawmawm an tih thu a tarlang a, "Kamlova Chhangte hian a tribal certificate hi ṭhiat/cancel turin Aizawl DC-ah ngenna a thehlut tawh niin hriat a ni. Tribal certificate cancel tura dilna lut mek hi a rang thei anga hma la zui turin sorkar kan ngen a ni," a ti.

Tribal ni lote'n tribal nihna chanvo an chan theih loh avangin tribal certificate pek chhuahna tura hriatpuinaah YMA branch-te chu fimkhur taka hma la zel turin CYMA chuan an ngen a, "YMA hmalakna avangin ST certificate hlihsak an awm tawh a ni," an ti a; tribal ni lo, tribal certificate nei hriate chu CYMA-a hriattir turin an ngen a ni.