Ka ST certificate sût a nih theihna atan document-te DC-ah ka thehlut - Kamrul Laskar

KR Construction neitu Kamrul Laskar Uddin chuan nimin khan thuchhuah siamin, a tribal certificate sût (cancel) a nih theihna turin document pawimawhte Aizawl DC hnenah a thehluh tawh thu a tarlang. Kamrul Laskar hi Mizo Students' Union chuan an zawng mek a ni.

Kamrul Laskar chuan a chhungte, a hnam leh sakhua kalsanin kum 1995-ah khan Mizoram Presbyterian Kohhranah baptisma a chan thu tarlangin, "Kum 2002-ah val upa leh khawtlang pawmpuina thlapin Mizo dan angin Mizo hnamah sa ka phun a ni. Khang hun lai khan contractor ka la ni lo a, harsa tak aṭanga bul ṭanin contract hi tun hnu kum rei lo te chhung ka thawk chho ve ta a ni," a ti.

Contract a thawh hnuah Mizoah an pawm ta lo nia sawiin Kamrul chuan, "Pawl tam tak leh mimalin min beih rawn ta a ni. Politics-ah a ṭhenin an kai lut zui a, DC-ah meuh tribal ka nihna cancel tura lehkha pe an awm hial a ni," a ti a; DC lam order pawh nghak zo loin ni tin beihna nasa tak a tawh chhoh thu a tarlang.

Kamrul Laskar chuan, a tribal certificate sût tura hma latu pawl ṭhenkhat chuan sum tam tham tak an dil thu sawiin, "Anni peka ka tribal certificate hum ai chuan, ka sa phun laia mahni fa leh mahni hnama min lawm luttute zah tak chungin ka certificate hi keima duh thu ngeiin cancel ni se ka ti. Pawl kuta ka certificate hi cancel tir ai chuan a thuneitu sorkar kutah ngei dah ka duh zawk a ni," a ti.

Kamlova Chhangte ni bawk Kamrul Laskar-a sawi danin, a tribal certificate tihtawpna turin document pawimawh - voter ID, driving license leh a tribal certificate copy-te DC Office-ah a pe tawh a ni.

A tribal certificate chu scan copy hun rei tak chhung a hman tawh avangin a original awmna an zawn hmuh zawh loh thu tarlangin, "Police-ah FIR ka thehlut tawh. A original hi lo hmu leh pawh ni ila, DC lamin an cancel tawh chuan khawiah mah a hman theih tawh dawn lo a, hman zui pawh ka tum tawh lo," a ti.

Tarlan tawh angin KR Construction hian Mizoram sorkar hnuaiah hna hrang hrang thawkin hna lian tak tak a ni hlawm.