Genome Sequencing Lab. la hman theih loh

State Refferal Hospital - Zoram Medical College (SRH-ZMC)-a Covid-19 chi hrang hrang hmuh chhuah leh zir chian theihna tur Genome Sequen­cing Laboratory chu Indian Council of Medical Research (ICMR)-in hman phalna a la pek loh avangin swab sample endik theih a la ni lo.

SRH-ZMC hotute chuan Vanglaini palai zawhna chhangin, Mizoram sorkarin Genomic Sequencing Lab. hman phalna ICMR aṭanga a hmuh loh chuan sample endik nan hman theih a nih loh thu an sawi a, "ICMR-ah sorkarin a dil mek a, ICMR-in inkaihhruaina a neih angte kan zawm a ngaih avangin hman phalna an rawn pek loh chuan swab sample endik leh a kaihhnawih hmanruate keimahni thuin kan leiin kan hmang ve ngawt thei lo," an ti.

Mizorama hripui vei dinhmun thlirin Genome Sequencing Lab. chu hman vat theih an duh thu sawiin, "Tunah chuan Covid-19 swab sample endik a, eng variant nge a nih hre turin ICMR-in kan sample thawn zat tur leh phaia kan thawnna tur hmun a ruahman zel a ngai a, nghah kual a ngaih avangin phai lama sample endik tur thawn hi a kawng a thui hle," an ti a; ZMC-a endik theih a nih hunah variant hrang hmuh chhuah a awlsam dawn thu an sawi.

Mizoram sorkar chuan Programme for Appropriate Technology in Health (PATH), Seattle, USA aṭangin Genomic Sequencing Laboratory dinna tur US dollar 52,000 a dawng a; October 27, 2021 khan Health minister Dr R Lalthangliana'n ZMC-ah Genome Sequencing Lab. chu a hawng a, India hmarchhak biala palina a ni.

Genome Sequencing Laboratory hi ZMC Virus Research and Diagnostic Laboratory (VRDL) building-ah dah a ni a; virus chi hrang hrang, Covid-19 leh Covid-19 ni lo te, bacteria, cancer genomics, HLA typing, adt. hmuh chhuah theihna a nih bakah, zirbingna atan hman theih a ni.

ZMC hotute chuan, Genome Sequencing Lab. chu USA aṭanga an dawn a nih avangin ICMR pawm a ngaih thu te, India rama Genome Sequencing Lab. dangte nen an result a in mil leh mil loh endik a ngaih thu leh ICMR pawmpui turin PATH mithiamte nen theihtawp chhuaha hma an lak thu te an sawi.