Lokayukta-in thubuai 39 ziak lut tawh

Mizoram Lokayukta chairman C Lalsawta chuan nimin khan Governor Dr Hari Babu Kambhampati hnenah Second Annual Report of the Mizoram Lokayukta 2020-21 a thehlut a; February 15, 2022 thlengin Lokayukta-ah thubuai 39 ziah luh a ni tawh tih a sawi.

C Lalsawta chuan, Lokayukta dinhmun leh hmalakna tlangpui a sawi a; tun dinhmunah Mizoram Lokayukta-ah thawktu tlemtê chiah an la awm thu leh thawktu lak belh thuai an mamawh thu sawiin, "Chak zawka hna thawk thei turin Enquiry/Investigation Wing leh Prosecution Wing-te din thuai a ṭul," a ti.

Lokayukta Chairman tarlan danin, February 15, 2022 thleng khan Mizoram Lokayukta-ah thubuai 39 ziah luh a ni tawh a, chu'ng zinga pathum chu preliminary enquiry (PE) neih hmain chinfel a ni. Thubuai 36 ziah luh zinga 20 atan PE thehluh a ni tawh a, thubuai 16 atan PE thehluh a la ni lo.

Tun dinhmunah thubuai 11 chinfel tawh niin, thubuai 10 atan preliminary hearing (PH) kohna pek chhuah a ni tawh a, PH neih zawh hnuah case pahnih hnâwl a ni. Thubuai pasarih chu chiang zawka chhui tura tih a ni bawk.