800 LPM Oxygen Generation Plant Synod Hospital-ah hawn a ni

Health minister Dr R Lalthangliana chuan nimin khan Synod Hospital-ah 800 LPM Oxygen Generation Plant a hawng a, oxygen concentrator pahnih a pe nghal.

Hawnna inkhawm hi Synod Hospital director Dr Lalṭhakima'n a kaihruai a; Dr R Lalthangliana chuan, Synod Hospital chu Mizorama damdawi-in hlun ber pakhat, kum 94 hmel hmu tawh a ni tih sawiin, "Mizoram chhung mai bakah, Mizoram páwn hmun hrang hrang aṭanga an pan, damlo retheite leh harsa tak takte pawhin an belh ṭhin a ni a, an thlamuanpuina hi a ropui. Pathianin he damdawi-in hi malsawmin a awmpui tih a chiang," a ti.

CSR kaltlanga Mamit District Hospital sak chu zawh thuai beisei a nih thu sawiin Minister chuan, "Serchhip District Hospital sak ṭhatna tur cheng vbc. 21 leh Kolasib District Hospital sakna tur cheng vbc. 22 hmuh a ni tawh a, rei lo têah hna ṭan theih beisei a ni," a ti bawk.

Synod Hospital-a 800 LPM Oxygen Generation Plant hi Program for Appropriate Technology in Health (PATH), Seattle, USA leh GiveIndia ten an pek a ni a, oxygen plant atana senso zawng zawng chu Google company-in an tum a ni.

Hawnna inkhawmah hian PATH operation manager Nilesh Gangware, Synod moderator Rev.Dr Vanlalnghaka Ralte, Synod Hospital medical superintendent Dr John Malsawma leh mi pawimawh dangte an tel.