Airport chei hna thawh mek titawpa Open tender chhuah ṭha turin phût

ZPM Ṭhalai chuan thuchhuah siamin, Lengpui Airport chei ṭhat hna thawh mek chu tihtawp a, open tender chhuah ṭhata chei hna thawktu tur thlan ṭhat an phût thu an tarlang.

ZPM ṭhalaite chuan, Lengpui Airport chei ṭhat hna thawk mektu chu restricted tender hmanga thlan a nih thu tarlangin, "A thawktu hi Kamlova Chhangte tih hmanga Mizo lem chang Kamrul Uddin Laskar, chief minister Zoramthanga nena inhnìmhnâi tak nia sawi a ni. Kamrula hi a official address-ah pawh hmuh tur a awm lo a, ZPM Ṭhalaite'n 11.2.2022-a hmuh tuma kan zawn pawhin kan hmu zo lo," an ti a, MSU pawhin an hmuh zawh loh thu an sawi.

Thil awm dan thlirin Lengpui Airport chei ṭhat hna thawhnaah thil fel lo lian tak a awma an ngaih thu sawiin ZPM Ṭhalai chuan, "Sorkar hian mihring tak awm si loin, mimal tu emaw hamṭhat nan Kamlova hming hawh chawpin work order an chhuah ta em ni, tih sawifiah ngei turin MNF sorkar kan phût. A bilha tho lo Lengpui Airport chei ṭhat hna Kamlova hminga thawh mek hi titawp a, open tender hmanga a thawktu tur thlang ṭha turin Mizoram sorkar kan phût a ni," an ti.

ZPM ṭhalai hruaitute'n December 1, 2021-a Lengpui Airport chei ṭhat hna thawh mek an enfiahnaah hna enkawltu engineer hmuh tur awm loin an bibo tawh tih an sawi bawk.