February 20-a Mizorama Covid-19 positivity rate 27.12% a tling

February 20, Pathianni khan Mizoramah Covid-19 vei mi 519 hmuh chhuah a ni a, positivity rate 27.12% a ni.

Covid-19 vei Pathiannia hmuh tharte chu mipa 236 leh hmeichhia 283 an ni a; TrueNAT hmanga hmuh 14 leh RAT hmanga hmuh 505 niin, RT-PCR leh FIA hmangin swab sample endik a ni lo. February thla chhungin positive mi 31,297 hmuh a ni tawh.

Mizorama district 11 zinga district pakuaah swab sample endik niin, positivity rate 10% chung lam vek a ni a, district pasarih 20% chung lam niin, district pathumah 30% chung lam a ni a, Champhai district-ah 65.57% a ni. Kolasib district-ah 10% a tling lo a, Lawngtlai leh Khawzawl district-ah sample endik a ni lo.

February 20-a Mizorama positivity rate chu 27.12% a ni a, ni 30 chhung a záwnin Covid-19 positivity rate 20% chung lam a ni tawh; January 22, 2022 aṭang khan ni tin positivity rate 20% aia sang vek a ni.

IDSP record angin, Mizoramah Covid-19 vei 2,06,319 hmuh chhuah a ni tawh a, mipa 96,662 leh hmeichhia 1,09,657 an ni a, mipa aiin hmeichhia 12,995-in an tam zawk.

Kum 2011 chhiarpui aṭanga chhûtin, Mizorama Covid-19 vei hmuh tawh 2,06,319 chu mi 1,000 zelah hripui vei mi 188 an awm ang a ni a; mi 1,00,000 zela Covid-19 vangin mi 58 an thi tawh ang a ni tih sorkar thuchhuakin a tarlang.

Mizoramah February 20, 2022 thlenga swab sample endik tawh 17,95,702 aṭanga positivity rate chu 11.49% a ni a; RT-PCR hmanga endik zat percentage chu 20.46 a ni a, RAT hmanga endik zat chu 73.86% a tling.