Tripura relief camp-a Mizoram Bru-te Vote thlak phalsak an ni - CEC

Chief election commissioner (CEC) Om Prakash Rawat chuan, November 28, 20189-a Mizoram Legislative Assembly inthlanpui neih turah Mizoram Bru, Tripura relief camp-a awm mekte chu vote thlak phalsak an nih thu leh, Election Commission of India (ECI)-in thil ṭul ang ang a bawhzui dawn thu a sawi.

Zan khat riaka Mizorama rawn zin Chief Election Commissioner (CEC) chuan nimin khan Aijal Club-ah thuthar thehdarhtute a kâwm a; Tripura-a awm mek Mizoram Bru-te an awmna camp-a vote thlaktir an nih dawn leh dawn loh chungchanga Vanglaini palai zawhna chhangin CEC Om Prakash Rawat chuan, "Vote thlak thei an ni a, vote thlak phalsak an ni. Chuta tan chuan ECI-in state level leh district level-ah officer-te a sawipui tawh a, ECI chuan tih tur ṭul ang ang a ti dawn a ni," a ti.

Om Prakash Rawat chuan, India khua leh tui, vote nei thei tawh zawng zawngin vote an thlak theih nan ECI-in hma a lak thu sawiin, "Khua leh tui vote nei zawng zawngin vote an thlak theih nan Commission chuan fimkhur takin hma a la a, a hmasain electoral roll-a an awm theih nan hmalak a ni a, chuta tan chuan form-te pawh download theiha dah a ni," a ti a; voter zawng zawngin vote an thlak ngei a pawimawh thu a sawi.

Kum 2014-a Lok Sabha inthlan dáwnah, April 7, 2014-ah ECI-in Mizoram páwnah Bru-te vote thlaktir an nih tawh loh tur thu ziakin Mizoram CEO-ah a thlen chungchang sawi lan a ni a; hemi chungchangah hian Om Prakash Rawat chuan, ECI-in commitment a lo neih tawh rualin, Indian Constitution angin khua leh tuite'n voting right an neih thu a sawi a, "ECI-in intiamna (commitment) a lo neih tawhte chu tihhlawhtlin tur a ni a, chutih rualin, Constitution angin ECI-in mawhphurhna a nei a, voter tumah hlam­chhiah tur an ni lo, tih a ni," a ti.

Press meet-ah hian, Mizoram aṭanga Bru tlanchhia, Tripura-a camp-a awm mekte chu vawi tam tak Mizoramah lak let tum an ni tawh a, lak let hnuhung ber (last repatriation) pawh zawh a ni tawh a, Mizo mipui leh NGO-te'n let tura an ti chung pawhin Mizoramah an lêt duh loh thu press mite'n an sawi lang a; Mizoramah Bru tam tak an awm, chu'ng mite chuan harsatna an neih loh thu an sawi lang bawk.

Mizorama let duh lote Mizoram electoral roll-a dah tlat chhan leh Tripura electoral roll-a thun an nih mai loh chhan zawhna chung­changah Chief Election Commissioner chuan, Mizoram electoral roll chu a kaih­hnawih hrang hrang (stakeholder)-te nen buaipuia khawih a nih thu a sawi a; Tripura electoral roll-a thun an nih loh chhan a sawi chiang lo.

Zawhna dang chhángin Om Prakash Rawat chuan, Tripura-a Bru-te ṭanpuina chu October 1, 2018 aṭangin tihtawp a nih thu leh, Bru-te dinhmun chu ECI-in a thlir reng thu a sawi.