BJP-in sorkarna kan siam dawn - BJP president Amit Shah

BJP chuan nimin khan R Dengṭhuama Hall, Aizawlah Booth Level Members Conference an buatsaih a, BJP National president Amit Shah-a'n hmanpuiin thu a sawi a; Mizoramah BJP-in sorkarna an siam dawn nia sawiin, "Thawhpui kan nei dawn lo," a ti.

Amit Shah chuan, Kris­mas hman hnai tawh tih sawiin, "BJP kaih­hruai sorkar hnuaiah Kris­mas hman a ni ang. Hmarchhaka inthlan a awm apiangin BJP a sorkar zel a, chu chu Mizoramah pawh kan hmabak a ni," a ti a; Mizoram MLA inthlana vote tlate chhiar a nih hnuah BJP-in state 20-ah sorkarna an siam tawh tur thu a sawi.

Narendra Modi kaih­hruai sorkar hnuaiah hmarchhakah danglamna hmuh tur a awm nia sawiin Amit Shah, "A hma zawngin hmarchhak hi eirûkna hluarna hmun tiin a lâr ṭhin. BJP-in sorkarna chanin, Prime Minister-in hmarchhak a ngai pawimawh nghal hle a, hmasawnna hna tam tak thawh a ni. Central minister-in ṭum 200 chuang hmarchhak state-te an tlawh tawh," a ti.

BJP President chuan, sorkar laipuiin ṭanpuina a pekte corruption vangin Mizoramah hman ṭangkai a ni lo ṭhin nia sawiin, "Mizoram Chief Minister-in min pek awmchhun chu corruption leh lal chhungkaw sorkar a ni a, tunah hian nasa takin a nau Chief Minister tir tumin hma a la mek a ni," a ti a; sorkar laipui aṭanga NLUP atana an sum hmuh pawh an eirû niin a sawi.

Amit Shah chuan, tourism lamah Mizoramin hmasawnna tur a ngah thu sawiin, "Mizoram sorkarin eirukna ringawt an ngaihtuah avangin tourism lama hmasawnna an rilruah a awm lo. BJP-in sorkarna a siam chuan, ram pum aṭanga khualzin hîp theihna atan Mizoram hi siam a ni ang," a ti.

Mipuite chawikanna tur sorkar laipuiin scheme 129 a siam thu sawiin BJP President chuan, "Chungte chu Mizo mi­puite'n an chhawr lo a, chhawr se chuan Mizo­ramin hma a sawn ngei ang," a ti a; sorkar laipui scheme-te tihhlawhtlin a nih chuan Mizo mipui­te'n Narendra Modi an fak dawn avangin, tihlawh­tling duh loah CM Lal Thanhawla a puh.

Amit Shah chuan, MNF leh Congress party-te chu kumin MLA inthlanah an thawhho dawn loh thu sawiin, "Seat 40 awm hi kan chuh fai vek ang. He state mawi tak hian Modi kaihhruaina duhawm tak rei lo têah a dawng dawn. BJP chuan corruption awm lohna, power supply ṭhatna leh kawngpui ṭhatna hmunah Mizoram a siam ang," a ti.

BJP President hian in­thlan hnhnung bera INC ticket-a Tuichawng bial aṭanga MLA atana thlan tlin Dr Buddha Dhan Chakma chu an party-ah a lawm lut a ni.

Inkhawmah hian BJP-in MLA inthlan lo awm tura Mizoram enkawltu atana an ruat, Assam Finance minister Himanta Biswas, National BJP general secretary Ram Lal leh Mizoram BJP president Prof. JV Hluna te pawhin thu an sawi a ni.