KHAWTHLIR

Award dawng
Aizawl district chuan tun hnai khan India ram puma hriselna lama ti ṭha lawmman '6th JRD Tata Memorial Award' a dawng. Award hi Aizawl district aiawhin Aizawl East chief medical officer Dr Lalzepuii'n India Habitat Centre, Delhi-ah NITI Ayog vice chairman Dr Rajiv Kumar hnen aṭangin a dawng a ni. Award hi nu leh nau hriselna, family planning leh hmeichhiate chawisanna kawnga ti ṭhate hnenah pek ṭhin a ni a, Aizawl district hian ‘High Focus NE State - High Wealth Level Category’ zinga lawmman pakhatna a dawng a ni.

C Silvera Chanchin
Mizo zinga sorkar laipuia minister awmchhun Dr C Silvera (L) chanchin ziahna, 'Dr. C. Silvara Chanchin' tih lehkhabu, K Lungruala buatsaih chu nimin khan Synod Conference Centre-ah Dr LN Tluanga'n a tlangzarh.

Free Being Me
Mizoram Bharat Scouts and Guides chuan nimin khan Modern English Higher Secondary School-ah 'Worshop on Free Being Me' tih an buatsaih a; state organiser Lalnunsiami'n kaihruaiin, Youth Welfare officer Saizampuii'n workshop hawnna thu a sawi. Workshop-ah hian Aizawl district-a sikul hrang hrang aṭangin Bharat Scouts and Guides unit leader 50 chuang an tel a ni.

Ran chhiarpui atan inbuatsaih
AH&Vety department, Kolasib district office chuan nimin khan India ram puma ran chhiarpui (20th. Livestock Census) neih tura thil pawimawhte inhrilhriatna hun an buatsaih. Livestock Census neih turah hian Kolasib district-a khaw hrang hrangte chu ward hrang 21-ah ṭhen a ni a, enumerator pasarihte'n fang kualin, ran vulh hrang hrangte chhiarpui an nei dawn a ni. Livestock Census hi India ram pumah kum nga danah neih a ni ṭhin.

Kolasib-ah training
Rural Development department hmalaknain nimin khan Kolasib-a SIRDPR hmunah Training cum Gram Panchayat Development Plan (GPDP) for Frontline Workers buatsaih a ni. GPDP hi kum 2022-ah chuan India rama retheihna a awm tawh lohna tura hmalakna a ni a, chumi tur chuan Kolasib district chhunga khaw hrang hrang dinhmun hrechiang tura survey neih a ngaih avangin training hi buatsaih a ni.