Mizoramah inthlanna dik, zalen, langtlang A awm kan duh ber - CEC Om Prakash Rawat

Chief election commissioner (CEC) Om Prakash Rawat leh Election Commission of India (ECI) hotu dangte chuan zan khat riakin Mizoram an rawn tlawh. Nimin khan Aijal Club-ah thuthar thehdarhtute kâwmin, Mizorama an chàm chhunga an thil tihte sawiin, Mizoramah inthlanna dik leh thianghlim, zalen leh langtlang a awm theih nan ECI-in theihtawp a chhuah thu a sawi.

Om Prakash Rawat chuan, Mizoramah inthlanna dik leh thianghlim tak a awm theih nan ECI-in nasa takin hma a la tih sawiin, "ECI chuan state level leh district level-a official, inthlanna tura mawhphurhna nei zawng zawngte chu hlauh leh ṭan bik nei lo a, mi thunun theiha awm lo turin a hriattir a ni. Mizoram inthlan turah hian vote nei thei hmaih an awm loh kan beisei," a ti.

ECI hotute hian Mizorama an chàm chhungin political party hrang hrang aiawhte leh NGO Coordination Committee aiawhte an kawm bakah, sorkar official - Chief Secretary, DGP, Home Secretary, DC/DEO, SP leh mi pawimawh dangte inthlan kaihhnawih thil hrang hrang an sawipui a ni.

Om Prakash Rawat chuan, political party-te chuan Mizoram mi Bru, Tripura-a awm mekte chungchang ECI hotute hnenah an thlen thu leh, inthlanna felfai leh thianghlim an beisei thu an thlen tih a sawi a, "Party ṭhe khat chuan ramri (international border) hnaih district-a venhimna chungchang ngaihven bik turin min ngen a ni," a ti.

CEC sawi danin, ECI hotute hnenah hian political party pakhat chuan inthlan laiin silai license-te thuneitute hnenah dahtir an rawt a, party pakhatin Chakma Autonomous District Council kaihhnawihah chi leh chi inkara harsatna a thlen lohna tura hma la turin ECI an ngen. Party pakhatin EVM chungchang an sawi lang a, voter-te'n EVM an rin ngam theih nana hma la turin an ngen. Party ṭhenkhatin sum sem chungchang, NLUP telin an thlen a; political party thar pakhatin candidate-te tan inthlan bik atana bank account hawn chungchangah harsatna a awm thu an thlen bawk.

Political party-te thu thlen hrang hrangte chu an chhinchhiah thu sawiin Om Prakash Rawat chuan, "ECI chuan a ṭul ang zelin hma kan la dawn a, inthlanna zalen, dik, muanawm leh langtlang a awm hi kan duh ber a ni," a ti.

Om Prakash Rawat chuan, "Supreme Court thupek angin, inthlana chuh tur, candidate zinga criminal record neite tan affidavit hranpa, an criminal record zawng zawng tarlanna tur siam a ni dawn," a ti a; criminal record tarlanna affidavit chu mi tin hmuh theih turin election website-ah dah tur a nih thu a sawi.

CEC chuan, state assembly inthlana a vawi khatna atan accessibility observer dah an ni dawn tih a sawi a, "General supervisor, exependiture observer, police supervisor leh micro supervisor-te pawh an awm dawn. Mizorama a vawi khatna atan Pink Polling Booth siam turin kan ti a, Pink Polling Booth hi hmeichhia hlirin an enkawl tur a ni a, constituency tinah pakhat tal siam a ni ang," a ti.

Chief Election Commissioner sawi danin, Model Code of Conduct bawhchhiatna leh thil dang dik lo, dan kalha thil tih a awm chánga mipuiin awlsam zawka complaint an thehluh theih nan mobile phone application 'cVIGIL' siam a ni a, tunah hian hman theih a ni tawh.

Tun ṭum Mizoram inthlanpuiah hian constituency 40 zinga pakhat (Aizawl East-I) chu general constituency niin, a bak zawng chu schedule tribe tana hauh a ni a; voter 7,68,181 an awm a, mipa 3,74,496 leh hmeichhe 3,93,685 an ni a; service voter 3,951 an awm.

Mizoramah polling station (PS) 1,164 a awm a, PS tinah voter assistance booth siam a ni dawn. Mizoram puma PS 1,164 zinga 77%-ah taksaa rualbanlote tana chet awlsam nan ramp siam a ni tawh a, PS 89.9%-ah tui in tur peih tawh niin, 95.3%-ah inthiarna siam a ni tawh. PS zinga 84%-ah kawlphetha thlun a ni tawh a, 98.2%-ah waiting room/shade siam a ni tawh bawk. PS-a dah tura tih la dah lohte chu inthlan hmain zawh vek tum a ni.

Mizorama EVM/VVPAT awareness campaign neih tawhna hrang hrang thlalak tarlanna lehkhabu, 'Mizoram VVPAT Awarness journey through lens' tih chu Om Prakash Rawat hian a tlangzarh nghal.

CEC Om Prakash Rawat hi Election commissioner pahnih - Sunil Arora leh Ashok Lavasa, deputy election commissioner Sudeep Jain, ECI director general Dhirendra Ojha leh director Vikram Batra ten an ṭawiawm a; nimin chawhnu khan Mizoram an chhuahsan a ni.