Hnahthialah ZPM-in campaign an hawng

Ṭangrual pawl, Zoram Peoples' Movement (ZPM) chuan nimin khan Hnahthial Bazarah pisa hawnna leh campaign hawnna inkhawm an buatsaih a, Aizawl aṭangin mi eng emaw zatin hmanpuiin, South Tuipui biala ZPM candidate tura ngaih Phairothanga leh mi dangte'n thu an sawi.

ZPM star campaigner PL Liandinga chuan, Lal­ramnghinglova (L) hla phuaha 'Dawi hlumtu fang rual' tiha 'Dawi hlumtu fang rual' zingah ZPM chu an tel ve lo tih sawiin, Mizorama sorkar ding tawhte-ah mipui an lungawi loh thu a sawi.

PL Liandinga chuan, Mizote chu thlahtute aṭang­in hnam huaisen an ni tih sawiin, "Tunlaiah huaisen leh huaisen lo tehna a váng khawp mai. Huaisen tehna ni ta deuh ber a ka rin chu, India pawisa note hi a ni. He baâl, India pawisa note hi keini ZPM chuan kan nei ve hauh lo, kan hmachhuan ve lo. Kan rin Pathian hi kan chhuang zawk a ni," a ti.

Mizoram mipuite'n kawngpui ṭhaa tlan an thiam ve a, thlai tharte chu man man zawkin an hralh ve thiam ve tho tih sawiin Liandinga chuan, "Sorkar policy hian zir se chuan, kan rorel khawlin tuna kawng ṭhalo te, thlai thar hralhna awm lote hi a ṭha zawk hi kan thiam ve tho a ni," a ti a; ZPM an sorkar chuan sum an sem ve dawn lo a, inthlan hma leh inthlan hnuah pawh sum an sem ve dawn lo tih a sawi.

PL Liandinga chuan, "Hna thawktute hnathawh endiktu an awm miau si lo a, kan hnathawh vawi thum hralh hnua hlép la awm theite hi hna thawktu thiam vang nge, kan ram rorel khawl thiam loh? Pawisa sem vanga dingchhuak ta eng sorkar mah a awm ngai lo. Kan ramah hian sem policy kan uar ta lutuk hian kan moral a tichhia a ni," a ti bawk.

South Tuipui bial viltu Phairothanga pawhin thu sawiin, Mizoramah hlemhlêtna a hluar a, rorelna dik lo a langsar a, hausa leh rethei inkar a zau a, beidawnna khurah mipui an tlu mek niin a sawi a, "ZPM hian kan au hla hi kan ṭha bik e, kan fel bik e, kan dik bik e, kan ti lo, hemite hi an sual e, an dik lo e kan ti bik pawh a ni lo, kan ram rorelnaah hian Pathian ram lo thleng se la, Pathian ṭih leh hre reng chungin rorelna hi i kalpui ang u, tih hi kan au hla a ni," a ti.