Minister hlui Thangzualla vui a ni

Mizoram sorkara minister of state hlui K Thangzualla (87) h/o Denghliri, Chanmari, Aizawl chu November 15, Pathianni zan dar 8:50 khan Pneumonia natna vangin a thi a, nimin khan vui a ni.

February 1, 1933-a piang K Thangzualla hi engineer niin, April 1960-ah Bachelor of Engineering (Civil) a zo a, Mizo zinga BE hmasa ber dawttu a ni. November 1960-ah PWD-ah assistant engineer-in a lut a, July 24, 1990-ah chief engineer a ni ṭan a, April 1, 1994 aṭanga February 28, 1995-a a pension thlengin PWD secretary a ni.Sorkar hna aṭanga a pension hnuah MNF party-ah lutin, kum 1998 tàwp lama Mizoram Assembly inthlanpuiah Serchhip bialah MNF ticket-in a ding a, chutih laia chief minister Lal Thanhawla hnehin thlan tlin a ni. State Planning Board-ah vice chairman a nih hnuah, kum 1999 aṭangin minister of state a ni a; Information Technology, Industry leh Sericulture department-te a enkawl.

K Thangzualla hi Cen­tral YMA-ah finance secretary a ni tawh a; sorkar hnathawk páwl hrang hrang intèlkhawmna, Federation of All Mizoram Government Employees and Workers Association-ah president a ni tawh bawk.