Inthlanpui atan inbuatsaih zel

November 28, 2018-a Mizoram Legislative Assembly inthlanpui awm tur atan Mizoram hmun hrang hrangah ngawrh takin inbuatsaih mek zel a ni.

Inthlan atana inbuatsaihna kal zelah, Serchhipah chuan nimin khan DC conference hall-ah additional DC Chuau­hnuna hoin political party aiawhte hma an lakna atana an hriat tur ṭulte hrilhhriat an ni.

Chuauhnuna chuan training buatsaih chhan sawiin, "Party hrang hrangte'n campaign-na atana phalna an lakna dan tur inhrilhriatna atan a ni. Dilnate chu online application ‘Suvidha’ ah dah luh vek tur a ni. Suvidha chu computer-a application pakhat a ni a, kum 2014 aṭanga hman ṭan a ni," a ti a; party tin hruaitute chu dan zâwm turin a chah.

Serchhip SDO(S) R Vanrengpuia chuan, inthlanpui atana inbuatsaihna kawngah public meeting, lirthei hman tur leh information office hawn chungchanga political party-te hriat turte a sawifiah.

Mamitah pawh October 16, Thawhlehni khan district election officer (DEO) J Miahlung hoin Systematic Voters Education and Electoral Participation (SVEEP) Core Committee-te 'Young Voters Conclave' October 23, 2018 a hman dan tur an rel.

SVEEP Core Committee Young Voters Clonclave, October 23, 2018-a hman tur hi Mamit College basketball court-ah chhun dar 12 neih an rel a; programme kimchang an duang nghal a ni.

Kolasibah chuan inthlanpui neih turah inbuatsaihna atana dan leh thupek lama hmalakna pakhat atan police-te chuan tunhnai bikah tualchhung siam zu ṭhahnem tak an man a, zu kaihhnawihah hian mihring 15 man a ni.

Kolasib SDPO C Lalmalsawma chuan, FIR a luh ngei loh chuan zu case hi ziahluh hleitheih a ni lo tih sawiin, "Hei vang hian tualchhung zu sak te ṭhahnem tak man thin mah ila FIR a luh ṭhin si loh avangin Election Commission of India lamah pawh achievement anga report theih a ni lo," a ti.