COVID-19: Mizoram dinhmun Vei hmuh thar 3, chhuahtir 7
November 15, Pathianni khan Mizoramah swab sample 835 endik zingah Covid-19 vei mi pathum hmuh chhuah a ni. Nimin khan hripui laka fihlîm tawh mi pasarih chhuahtir an ni thung.
Mizoramah Covid-19 positive mi 3,396 hmuh chhuah a ni tawh a, mipa 2,528 leh hmeichhia 868 an ni. Nimin tlai dar 5 thleng khan mi 2,883 (84.89%) chhuahtir an ni tawh a, mi panga (0.15%) thi tawhin, enkawl mek mi 508 (14.96%) an awm.
Mizorama hripui vei hmuh tawhte zinga mi 1,536 chu Mizoram chhunga kái an ni a, mi 1,860 chu state páwn aṭanga rawn lut an ni.
Covid-19 vei hmuh chhuah thar pathumte chu mipa vek an ni a; TrueNAT-PCR hmanga Saitual Hospital-a hmuh mipa pahnih, kum 26 leh 57, Bihar aṭanga rawn lutte leh, Rapid Antigen Test (RAT) hmanga Kanhmun screening point-a hmuh mipa kum 23 mite an ni.
Bihar aṭanga rawn lutte chu NHIDCL hnuaia hna thawk, an hmuna inkhung lai an ni a, Kanhmuna hmuh chhuah chu Assam Regiment sipai, quarantine facility-a awm lai a ni thung a; symptom nei lo vek an ni. ZMC laboratory-ah erawh swab sample endik a ni lo.
Hripui laka fihlim tawh zinga mi pasarih nimin khan chhuahtir an ni a; SRH-ZMC aṭangin pahnih, Lawngtlaiah pahnih, Champhaiah pakhat leh home isolation-a awm pahnih an ni. Pathianni tlai/zana enkawlna hmun aṭanga chhuahtir, nimin Vanglainia tarlan hman loh mi 21 an awm bawk.